Vawiin khan Lunglei DC Pi K. Lalrinzuali chuan Sawrkar Laipui Ministry of Women and Child Development hmalakna ‘Rashtriya Poshan Maah’ (National Nutrition Month) a Office Chamber-ah Lunglei District tan a hawng. Hawnna inkhawm-ah hian thutiam sawihona neih a ni.

Lunglei DC Pi K.Lalrinzuali chuan POSHAN Abhiyaan chu naupang, nu nau pai, tleirawl leh hmeichhiaten an mamawh ang eitur tha leh hrisel an dawn theihna tura ram puma hmalakna a nih thu a sawi a. Sawrkar laipui hmalaknain September thla chu India ram pumah National Nutrition Month ‘Rashtriya Poshan Maah’ –a puan niin hemi pual hian September thla chhungin Department hrang hrang tawngkawp ten hmalakna an nei dawn a ni, a ti. Hmasawnna tluantling nei tur chuan mipuite hriselna a pawimawh hmasa a ni tiin Lunglei Bawrhsap chuan chaw tha ei leh tui thianghlim in pawimawhzia mipui tam zawk ten anlo hriat theihna tura theihtawp chhuah theuh turin Lunglei mipuite a sawm a ni.

National Nutrition Month chhung hian Rally neih tum anih bakah Lunglei District chhunga School hrang hrangah Women & Child Development, Social Welfare, H&FW, Rural Development, Agriculture, Food & Civil Supplies, PHE leh UD&PA te tangkawpin Awareness Campaign an nei dawn a ni

Poshan Abhiyan (National Nutrition Mission) hi Mizoram-ah Women & Child Development Department ten hlawhtling taka kalpui mekin August 23, 2019 khan “Overall Excellence in Implementation” leh “ICDS-CAS Implementation” award te Women & Child Development Department Secretary, Director leh department official ten Union Minister for Women & Child Development Smriti Zubin Irani hnen atangin an dawng a ni.