State Election Commission, Mizoram chuan thuchhuah siamin Aizawl Municipal Corporation hnuaia Chaltlang, Chhinga Veng leh Kanan Local Council member pakhat theuh boral avanga an hmun ruak hnawh khahna tura inthlan buatsaih chu tluang taka zawh a nih avangin lawmawm an tih thu an sawi a. Vote thlak ni August ni 30, 2019 khan Chaltlang, Chhinga Veng leh Kanan Local Council Constituency-a vote nei thei mi 12583 atangin mi 5369 te'n vote an thlak a. Vote tla te hi 42.67% a ni. Chaltlang Local Council Reserved Seat chuhtu pathum zingah Pi Lalramhluni, MNF Party candidate chuan vote awm zawng zawng 4881 atangin Vote 865 hmuin tlingah puan a ni a, Chhinga Veng Local Council Reserved Seat chuhtu pathum zingah Pi H. Lalhruaikimi, MNF Party candidate chuan vote awm zawng zawng 4932 atangin Vote 911 hmuin tlingah puan a ni a, Kanan Local Council General Seat chuhtu pathum zingah Pu C. Lalrinzuala, MNF Party candidate chuan vote awm zawng zawng 2770 atangin Vote 759 hmuin tlingah puan a ni bawk.

Inthlanna tluang leh hlawhtling taka neih theih chhan chu Aizawl Deputy Commissioner & District Municipal Election Officer leh a thawhpuite inpekna leh thawhrimna a ni an ti a, dan leh thupek kenkawh chungchangah leh inthlanna boruak muanawm tak neih theihna tura venhimna hna thawktu Superintendent of Police, Aizawl District leh a thawhpuite chungah lawmthu an sawi. Returning Officer, Assistant Returning Officer, Presiding Officer leh Polling Officer te, theih tawp chhuahna avang leh mipuite tawiawmna avangin tluang takin inthlanna neih a ni tih an hriat thu sawiin an chungah lawmthu an sawi a. Inthlanna muanawm leh thianghlim nei thei tura Mizoram Peoples' Forum te, Chaltlang, Chhinga Veng & Kanan mipui leh YMA te'n hma an lakna leh thawh rimna avangin inthlanna felfai, chhuanawm tak neih a ni tiin lawmthu an sawi bawk a ni.