Vawiin khan New Economic Development Policy (NEDP) hnuaia sawrkarin ruihtheih thil laka thalai te an fihlim theihna tura ruahmanna a siam 'Project Himna MADAT'(Mizoram Against Drugs, Alcohol and Tobacco) hmalakna in Royal Knights Bullet Club, Lunglei ten Rally an neih chu Dr. Ankita Chakravarty, IAS, Deputy Commissioner Lunglei in DC office kawtzawl atangin a vai liam.

Dr. Ankita Chakravarty chuan Himna MADAT hmalakna a Royal Knights Bullet Club thalai ten ruihhlo, Zu leh vaihlo that loh zia au chhuah puia rally an neih avangin lawmawm a ti a. Ruihhlo, Zu leh Vaihlo hian kan taksa ah natna hrang hrang a thlen a, chhungkua ah sum leh pai ah harsatna tam tak a thlen bawk a ni a ti. Kalkhawm te chungah an hun hlu tak senga an kal avangin lawmthu a sawi a, Vawiin ni a an hun hman chu hlim tak leh midang te tan a tangkai taka hmang turin duhsakna a hlan nghal bawk a ni.  

Dr. SR. Ngurchamliana, Medical Superintendent, Civil Hospital Lunglei pawhin AOC, Petrol pump ah thu sawiin thalai ten ruihhlo hrang hrang an tih te hi an chhiat phah hle a, chumi do nan chuan kan ram in a tha zawng a ke kan pen theih nan tiin Mizoram sawrkar chuan hetiang hun hi a buatsaih thu a sawi. Himna MADAT awmzia sawifiah in kumin May atanga kalpui ni in kalphung thar a ni a ti. Lunglei khawpui chhung school hrang hrang 40 chuang ah awareness campaign a nih tawh thu sawi in. Mizoram ah hian mi 100 zel a 58 hian zuk leh hmuam, vaihlo leh a kaihhnawih ti ang a chhut kan nih thu a sawi a. Ruihhlo no 4 kan sim tawh ang a kan ngaih khan kum 2 kalta vel atang khan min run thar leh in hei hian nasa takin kan thalai te nun ah chhiatna a thlen a ni a ti. Mizoram a HIV AIDS hluar nachhan ber chu keimahni insiam chawp a ni a, vanduaina avang a kai chu tlemte an ni. Hei hi a chhan bul pui ber chu ruihhlo hluar tak vang a nih thu a sawi bawk a ni.

Lalramhluna, President, Royal Knights Bullet Club, Lunglei chuan Bazarveng, SBI kawt ah thu sawi in Thalai te ruihtheih thil in nasa takin min chiah a, chumi do let nan chuan he Himna MADAT Project hi kalpui a nih thu a sawi. School hrang hrang ah awareness campaign neih a nih tawh thu leh vawiin a hun kan hman hi mipui nawlpui huap Rally a nih thu sawiin mipui ten hlawkpui ngei tura a beisei thu leh midang te hrilh hre tu leh hma la tu ni theuh turin kalkhawm te a chah bawk a ni.