No.3474/2021-2022

Aizawl, the 20th December 2021 : Lirnghing chungchang zirchianna atana khawl pawimawh tak Seismic Broadband Station chu Mizoram sawrkar, Pachhunga University College (PUC) leh CSIR-NEIST, Jorhat, Assam tangkawp hmalakna in Mizoram hmun pathum - Aizawl, Khawbung leh Lunglei a bun tura ruahman a ni a. Chung zinga pakhat chu DISTRICT EMERGENCY OPERATION CENTRE (DEOC) Lungleiah vawiin khan Lunglei DC & Chairman, District Disaster Management Authority Pu Kulothungan A in a hawng.

Lunglei DC Pu Kulothungan A chuan Mizoram chu seismic zone-V chhunga awm niin lirnghing na tak tawng thei dinhmunah a awm avangin lirnghing chungchang zirchian belh a, chhiatna hrang hrang thleng thei hmachhawn tura inbuatsaih theih dan tur te hriat belh chu a pawimawh takzet a ni, a ti a. Seismic Broadband Station chu Lunglei District Disaster Management hmalaknaa hmanraw tangkai anih ngei a beisei thu a sawi bawk.

Vawiin program hi Pu M. Misael, Additional DC, Lunglei-in kaihruaiin Dr Saitluanga, HOD, Department of Geology, Pachhunga University College (PUC)-in Technical Report a pe a ni.

Mizoram hmun thuma Seismic Broadband Station dah hmang hian lirnghing data chhinchhiah thin a ni ang a. Data zawng zawng hi PUC, Aizawl Seismology Centre ah vawn that niin, CSIR-NEIST leh Department of Geology, PUC ah chiang zawka zirchian a ni ang. Heng zirchianna a thil hmuhchhuah pawimawhte chu sawrkara a kaihhnawih department-ten hmalak zelna atana an hman tangkai thei dawn a ni. Kum 20 kalta atang khan Mizoram leh a chhehvelah lirnghing magnitude 4.0 leh a aia sang engemawzat a lo awm tawh a ni.