UGC bultumin Department of Political Science, Govt. JB College chuan I&PR Conference Hall, Bazar Veng-ah ni 2 awh tur ‘National Seminar on Bureaucracy & Rural Development in North East India’ an buatsaih a, vawiin khan Khuallian Lunglei DC Pu Ashish Madhaorao More-in Seminar a hawng.

Seminar hawnna inkhawm Dr.Vanlalngaii, IQAC, GJBC kaihhruaiah Khuallian Pu Ashish More chuan Civil Service-a inziak tlingten mahni awmna tur Cadre an thlang thei lova, Cadre pek an nih ang ang chu an pawm mai a ngai a, thenkhatin chhungte hla taka kalsan an harsat thin avangin ram hmasawnna kawnga thawh hlawk thei tur mithiam engemawzatte chuan Civil Service kalsanin hna dang an thawk phah thin a ni, a ti a. A lehlamah chuan Civil Service-a lut, Cadre eng pawh pek nih pawi ti lova, an awmna hmun apiangah lungawi leh theihtawp chhuaha thawk an awm bawk a, heng miten harsatna an tawh lian ber chu transfer zin lutuk leh chumi avanga an chhungkaw nun a nghawng thin hi a ni thung a. Chuvangin sorkar pawhin Civil Service mite hamthatna tur leh posting chungchangah pawh ruahmanna tha zawk siam thei se, hmun kilkhawr zawka posting-a awmte phei chu an chhungkaw inenkawlna leh an fate lehkha zirna turte a buaithlak thin avangin a bik takin ruahmanna ngaihtuah sak ni thei se chu Civil Servants-te tan pawh hnathawh a nuamin, eng hmunah pawh rilru engthawl takin hna an thawk ang a, ram hmasawnna pawhin a sawtpui ngei a rin thu a sawi a. Mimal tak chuan hmarchhak biala hnathawh chu nuam a tiin theihtawp chhuah zel a inhuam thu sawiin Pu Ashish More chuan Civil Servants-te inpumpekna awm thin mahse hmasawnna ruangam (infrastructure) a chhiat viau hi chuan hnathawh sawt a har thin a ni, a ti a. India rama mipuite rorelna (democracy)-ah hian Bureaucrats-te pawimawhna a sang hle a, a bik takin election hunah phei chuan politics awn lam neih an nih loh avangin thawhhona tha tak nen inthlanna felfai tak neih theih thin a ni a; election laia inpawhna leh thawhhona tha awm thei ang hi hnathawhna kawng dangah pawh kalphungah nei thei ila chu duhthusam a ni, a ti bawk.

Vawiin Seminar hawnna inkhawmah GJBC Principal Dr.J.Zorema chuan an College-in rampum huap seminar a thleng thei chu lawmawm a tih thu leh Seminar chhim tura state pawn atanga lo kal zawng zawngte lawmna thu a sawi a. Dr.J.Doungel, MZU chuan keynote address a sawi bawk a ni. Seminar neih chhung hian Mizorama Zirna Inpui - Govt. JB College, Govt. Lunglei College, Pachhunga University College, Govt. Saitual College, Govt. Kamalanagar College, MZU te bakah Assam University, Silchar; Tripura University, Agartala, Pathar Kandi College, Karimganj leh Manipur University atanga mithiamten thupui hrang hrang hmangin hun an chang a ni.