Lunglei Deputy Commissioner, Pi K.Lalrinzuali chuan nizan khan MSU Regional Headquarters Lunglei buatsaih Mizoram chhimlam zirna in te intihsiakna ‘SOUTHERN MIZORAM INTER POST MATRIC QUIZ COMPETITION (MPSC CHALLENGE) 2019’ chu Excise & Narcotics Conference Hall-ah a hawng. He Quiz Competition hi JB Cable Network, Lunglei leh LDF Cable Lunglei kaltlanga Live a pek chhuah niin Mizoram chhimlam District pathum – Lunglei, Siaha leh Hnahthial District atangin zirna in sawm (10) an tel a ni. Hawnna inkhawm ah hian official-te, MSU hruaitute, zirtirtute leh zirlai thahnem tak an kalkhawm.

Lunglei DC Pi K. Lalrinzuali chuan Quiz Competition a ngaih hlut thu sawiin he intihsiakna tha tak hian zirtirtu leh zirlaite rilru chawk thova inelna thianghlim leh tha tak a thlen ngei a rin thu a sawi a. Zirlai kalkhawmte hnenah fuihna thu sawiin hmathlir thui tak nei chunga an zirlai te zir tur leh an zirlaibu piah lamah newspaper chhiar leh news en te ngai pawimawh turin a chah a. An chhungkua, khawtlang leh ram tana chhawr tlak ni tura theihtawp chhuah tura fuihin ram leh hnam tana mi pawimawh, nakin lawka kan ram leh khawtlang hruaitu tur an ni tih hre thar leh turin a chah bawk. Quiz Competition a tel te chu duhsakna hlanin he intihsiakna hian zirlaite hriatna tizauvin an zirlai ah thui taka a tanpui a beisei thu a sawi a. MSU Regional Hqrs Lunglei ten zirlaite hmakhua ngaia intihsiakna hlu tak an buatsaih avangin an chungah lawmthu a sawi bawk.

He hunah hian Pu H. Lalremruata, Farm Veng Lunglei chu khualzahawm niin Pastor Sabbaththanga’n hunserh a hmang.

‘Southern Mizoram Inter Post Matric Quiz Competition (MPSC CHALLENGE) 2019’ ah hian Lunglei, Siaha leh Hnahthial District atangin zirna in sawm (10) – Government J Buana College, Sacred Heart Higher Secondary School, Silver Mount School, DIET Lunglei, Lunglei Government College, GHSS Lungei, Govt. Leitlangpui HSS, GHSS Hnahthial, Don Bosco School Siaha leh St Thomas Higher Secondary School New Siaha te an tel a ni.