Kan hma lawka Lok Sabha inthlan lo awm tur atana inpuahchahna kal zelah nimin khan Lunglei Government College Multipurpose Hall-ah Lunglei DC Pi K. Lalrinzuali chuan ECI hmalakna thar pakhat Vote thlak pawimawh zia inzirtirna ‘Voter Awareness Forum (VAF)’ chu Lunglei District tan a hawng. He hunah hian sawrkar department hrang hrang atangin official thahnem tak an kalkhawm.

Lunglei DC Pi K. Lalrinzuali chuan Lok Sabha inthlan April ni 11, 2019 a neih turah Lunglei District in Voter turnout sang tak a neih ngei theihna turin NGO leh khawltang hruaitute nen thawkhoin election kaihhnawih sawrkar official ten theihtawp an chhuah mek a ni, a ti a. Election hawlthling tak a awm theihnan kalkhawmte chu anmahni zawn theuhah hma la tur leh Election Commission of India in dan leh ruahmanna thar engemaw zat a siam te lo inzir thin turin a chah a. Voter Awareness Forum chu Sawrkar Department hrang hrang bakah NGO leh Corporates ah te pawh din tur ani a, he Forum kaltlang hian inthlanna a vote thlak a pawimawhzia leh inthlan kaihhnawih thil pawimawh chi hrang hrang inzirtir tur anih avangin inthlanna a vote tla pawh nasa takin a pun phah beisei a ni, a ti.

He hunah hian Department tin ten Voter Awareness Forum (VAF) hnuaia hmalakna an neih tawh te an report a ni. Lunglei DC chuan hmalakna nei chhunzawm zel tur leh an report thlalak nena thehlut thin turin a chah a ni.