March ni 18, 2014 atanga Lunglei Deputy Commissioner hna chelh tan Pu Ashish Madhaorao More, IAS chuan vawiin khan Lunglei chanchinbumite chu ama office chamber-ah kokhawmin, inhmeltirna leh MP inthlan chungchanga an hriat tur thil pawimawhte a sawipui a ni.

DC Pu Ashish More chuan MP inthlan lo awm tur atana inbuatsaihna kal chho mek chungchang sawiin First Level EVM Checking chu zawhfel tawh a nih thu te, Election duty-a chhuak tur Presiding Officers leh Polling Officers te tan training neih mek a nih thu leh ECI duhdan angin MCMC, Flying Squad, Expenditure Accounting Team, Video Surveillance Team leh Video Viewing Team te pawh ruatfel vek an nih tawh thu a hrilh. Lunglei District huamchhunga Polling Station 175 zingah ‘Urban Polling Station’ anga chhiar 45-ah VVPAT hman a nih tur thu a hrilh bawk a ni.

Pu Ashish More chuan chanchinbumite zawhna hrang hrang chhangin inthlan hunchhung leh Lunglei-a a awm chhungin thawhhona tha tak nei a, sorkar hmalaknaah pawh thlawp tha zel turin a sawm a ni.

Vawiina Press Meet-ah hian AIR Lunglei Station Director Pu D.R.Lalropuia leh DIPRO Lunglei Pi Mina Zoliani Joute ten DC hi an tawiawm a ni.