Vawiin khan Lunglei District Bawrhsap Dr Ankita Chakravarty, IAS chuan DC Conference Hall-ah Lunglei District MJA member te kawmin inhmelhriatna hun an hmang a, Lunglei District hmasawnna tura hmalakna hrang hrang te a sawipui bawk.

Dr Ankita Chakravarty chuan khawvelin Journalist te hi a ngai pawimawhin a ngai hlu em em a, 'The Fourth Estate' tih hiala koh niin kan ram inrelbawlna Democracy vawngnung zel turin an pawimawh takzet a ni, a ti a. Media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a.  Uluk leh fimkhur taka thu ziak thin tur leh an thuchhuah tur chu thudik a ni em tih finfiah hmasa thin turin a chah bawk. Sawrkar hmalakna leh schemes hrang hrang te zau zawka puanzar aniha mipuiten an hriat zel theihnan Lunglei District MJA-te thawhpuiah a sawm a ni. Lunglei District ti hmasawn zel turin chak taka ke pen zel a tum thu Lunglei DC hian a tarlang bawk.

He huna thu sawitu dang Pi C. Lalremruati, Lunglei DIPRO chuan Lunglei District-a media dinhmun tlangpui leh I&PR Department leh Lunglei District MJA-te tangkawpin District hmasawnna tura kawng hrang hranga hmalakna an neih te a sawifiah a.  Kum kalta khan Gujarat leh Kolkata-ah te Press Tour buatsaih niin Gujarat Industries Power Co. Ltd, BISAG, Gujarat Industrial Development Co, Kolkata Press Club, Kolkata Municipal Corporation te an tlawh bakah Gujarat Chief Secretary, Gujarat Principal Secretary GAD leh Press Club Kolkata President leh senior journalist-te an kawm thu a sawi a. Hemi bakah hian District chhunga hmasawnna ruhrel pawimawh te tlawhin Darzokai Suspension Bridge, Tlabung Highway leh 132 kv line (Alternative Line) ah te Site Inspection neih a nih thu a tarlang a. Media mi te leh Mizoram sawrkarin thawhhona tha tak an neih zel theih nan  I&PR Department chuan a theihtawp a chhuah chhunzawm zel dawn a ni, a ti.

Lunglei District MJA President Pu H. Lalthansanga leh member dangte pawhin thu sawiin an thil ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hunt ha tak a buatsaih avangin DC chungah lawmthu an sawi a, MJA tana inhawng taka hnathawk duh mi a nih naah a chungah lawmthu an sawi bawk. Inkawmhona ah hian zirna, hirselna, sumdawnna, hmasawnna ruhrel leh kawng hrang hranga Lunglei District dinhmun te an sawiho.