Vawiin chawhma dar 10:00Am khan DC Conference Hall-ah DDCMC/DISHA meeting nei a ni a. Meeting hi DDCMC Chairman Pu CL Ruala,  Hon'ble MP(LS) leh Co-Chairman Pu Ronald Sapa Tlau, Hon'ble MP(RS) ten an kaihruai a ni. Meeting-ah Siaha Bialtu MLA Dr.K.Beichhua leh Pu N.Zakhai CEM MADC te an tel bawk a ni.

Vawiin meeting-ah hian 2017-2018, 4th quarter( Jan-March,2018) chhunga Dept hrang hrang ten CCS hnuaia an hmalakna tawhna leh an hmachhawp te report pein, an harsatna hrang hrang te Hon'ble MP 2 te hnenah  an thlen bawk a ni. 

Pu CL.Ruala chuan Head of Office te chu CCS sum hmang ram rotling siam tur leh  mipui te nun khawnawm zawkna tur rahbi tuksak tura tan la theuh turin a chah hlawm a. In harsatna tawhna report ngaihthlak ai hian in achievement report ngaihthlak tur hi tam zawk thin rawh se, tiin meet HoO te chu a fuih hlawm a ni. 

Pu Ronald Sapa pawhin thu sawiin, Tuktin hnathawk tura in chhuah hian engtikah nge  Tranfer order a chhuah dawn tih nghak a hnathawk lovin, Vawiinah hian mipui tan thil chhenfakawm enge ka ti theih ang, ti rilru nen hnathawk thin ru, tiin HoO kalkhawm te chu a chah hlawm.

Vawiin 4th quarter review meeting a point highligth langsar zual te chu:

DRDA atangin 4th quarter chhung hian MGNREGS hnuaiah ni 10 inhlawhna thawh a ni a. 2017-2018 chhung hian avaiin ni 78 inhlawhna siam a ni.

PMAY-G hnuaiah 2017-2018 chhung hian Chenna In 140 target a ni laiin, Fund chengkhat mah la dawn lo a ni a. 2016-2017 chhung hian chenna In 567 sak tura target a ni laiin 224 chauh sak a ni tih pawh report a ni.

CMO office atangin IMR chungchangah report pe in,2014-2015   khan IMR 116 a ni laiin, 2017-2018 ah chuan 24 a tla hniam tawhin Mizoram District 8 te zingah IMR  sanna lamah Siaha district hi 5-na a ni mek a ni. Tun 4th quarter chhunga IMR chu 20 a ni a, nausen 7 an thi. Measles-Rubella Vaccination campaign-ah Mizoram District 8 zinga a hun taka tan thei awm chhun kan ni a. A chievement  pawh 101% lai a ni. Malaria avanga thihna a awm lo va, mi 1104 thisen test atang Malaria PF hrik pai 7 leh PV hrik pai 2 hmuchhuah a ni.  Nu naupai 116 thisen test-ah leh  midang 128 thisen test-ah HIV hrik pai tumah an awm lo. Hospital sak zawh a la ni loh avangin NEDP Fund atang hmanrua tamtak lo thleng hi dahna turah kan buai hle a ni, tiin report an pe. 

Siaha -ah tunlaia tui harsatna chhan PHE dept chuan report pein, Siaha-Tisôpi kawng lai mekin Gravity  hmanga tuilakna pipe zawng zawng a ti chhe vek a. Tunah hian SGWSS hnuaia tuitlawk tui pump chauh kan ring mek a. Tuitlawk tui pump hi  Gravity hmanga tui lak tanpui tura duan niin, nikhatah darkar 3 vel chauh pump tura duan a ni laiin, tunlai takah hian mipui te tui harsatna phuhhruk turin nikhatah darkar 8 te pump a ni mek a ni. He tuitlawk tui pump hi a chhiat vaih chuan Siaha khawpui chu tui nghei thei dinhmunah a ding mek a ni, tih report a ni bawk. Ni 26.11.2017 khan Siaha district chu OPen defecation free a puan a ni thu tarlan a ni bawk.

PWD atangin report ngaithlak a niin, PMGSYhnuaia kawngsial hna thawh mek zingah  Rawlbuk-Lungtian inkar kawng 14Km a thui leh Niawhtlang-Chakhei inkar 29.79Km a thui thawktu contractor te an thawh that loh avangin Terminate tura process mek a ni, tih report a ni.

DSWO office atangin report pein 4th quarter chhung hian IGNOAPS, IGNWPS, IGNDPS leh NFBS atan fund dawn leh semchhuah zawng zawng hi Rs.71,55,500/- a ni.