Vawiin chawhma khan Lunglei Bawrhsap Pi K. Lalrinzuali, Lunglei SP Pu C. Lalthanmawia leh Election Official dangte hovin DC Conference Hall ah Lunglei District Press Meet on Lok Sabha Election 2019 neih a ni. He hunah hian official-te leh Lunglei District MJA member-ten kan hma lawka Lok Sabha inthlan lo awm tur chungchangah inkawmhona hun tha tak an hmang.

Lunglei DC Pi K. Lalrinzuali chuan Lunglei District huamchhungah Polling Station 188 a awm thu leh heng Polling Station inpuahchahna te Sector Officer 29 ten uluk taka an vil thu a sawi a. Polling Station tinah Electronic Voting Machine (EVM) leh Voter Verifiable Paper Audit Trail (VVPAT) hman a nih tur thu sawiin heng EVM leh VVPAT Commissioning (hman theih tura buatsaih) chu vawiin chawhma atang khan Saikuti Hall-ah neih tan a nih thu a tarlang. Lok Sabha Election vil tura Election Commission of India in a ruat General Observer Pu Krishna Kumar, IAS leh Expenditure Observer Pu Pradhuman Meena, IRS ten election hmachhawn tura Lunglei District inpuahchahna a hmuna an rawn enfiah tawh thu leh inpuahchahna tha thawkkhat a an hriat thu a tarlang bawk. Hemi bakah hian polling day a duty turte tana training ngawrh taka kalpui a nih thu te, election kaihhnawih team hrang hrang (Video Surveillance Team, Static Surveillance Team, Video Viewing Team etc) te tha taka an duty thu te, Vote thlak pawimawh zia inzirtirna Voter Awareness Forum chak taka kalpui a nih thu te leh Model Code of Conduct chungchangah complaint dawn ala awmloh thu te a tarlang. MP Election ah Lunglei District in Voter Turnout sang tak a neih theih nan Vote thlak pawimawhzia mipuite zirtirna kawngah media mite thawhho puiah a sawm.

Lunglei SP Pu C.Lalthanmawia chuan election hmachhawn tura dan leh thupek kenkawh kawnga hmalaknate sawiin tun dinhmunah harsatna liantham a awmloh thu leh Polling Station ven uluk ngai zual (Critical Polling Station) kan neih loh thu a tarlang a. Inthlan vuakveta duty tura police mi 430 leh BSF platoon khat ruahman an nih tawh thu a sawi bawk. EVM leh VVPAT dah thatna Saikuti Hall-a Strong room veng turin thuah thumin ven a ni dawn a, a chhungril berah BSF sipai Silai nen an duty ang a, a thuah hnihnaah State Armed Police te duty lehin, a pawn berah Tualchhung Police te an duty dawn a ni. Inthlan vuakvet ah Silai hmanga intihthaih leh invau a awm loh nan Lunglei District chhunga Silai nei zawng zawng ten an Silai te Police Station/Police Outpost hnai ber a tung tura thuchhuah siam a nih tawh thu sawiin tun dinhmunah Active License nei mi 1996 atangin mi 1433 (71.79%) ten an tun tawh thu a tarlang bawk. 

He hunah hian Lunglei DIPRO Pi C. Lalremruati’n inthlan chungchanga media te kaihhruaina Media Certification and Monitoring Committee (MCMC) chungchangah zirtirna a pe bawk. 

Vawiin Press Meet-ah hian Lunglei MJA President Pu H. Lalthansanga hovin media mi thahnem tak an kalkhawm a, zawhna leh chhanna hun tha tak an hmang bawk.