Kumin Khawthlangtuipui lianin Tlabung leh a chhehvel khaw hrang hranga harsatna a thlenna hmun te chu vawiin khan Lunglei DC Pi K. Lalrinzuali chuan a hmunah tlawhin a enfiah. Tin, Tripura relief camp atanga Bru hruai kir te awmna hmun tur khaw thenkhat te a tlawh bawk. Lunglei DC hi Lunglei District atangin SDO (S) Pu Lalnundika, SO Pu M. Misael, DLAO Pu J Miahlung, DIPRO Pi C. Lalremruati, SDC Pu Lalthakima Chhangte leh Lunglei Sub Hqrs YMA Secretary Pu Ngurthansanga ten an tawiawm a ni.

Hemi pual hian Tlabung YMA Run-ah inkawmhona neih niin Tlabung SDO(C) Pu Henry Lalrawnkima'n a kaihruai a. He hunah hian Tlabunga Department hrang hrang Head of office-te, Tlabung leh Zodin VC leh YMA hruaitute, MHIP leh Tlabung Progressive Society hruaitute an tel.

Lunglei DC Pi K Lalrinzuali chuan thu sawiin tuilian vanga Tlabung mipuite harsatna tawh chu sawrkarin a hriatpui thu leh tun hma atanga khawpui hmasa a nih avanga ngaihthah chi a nih loh thu a sawi a. Disaster Management and Rehabilitation kaltlangin cheng nuai 114 senga sak tur Safe House project ruahman mek a nih thu leh Tlabung Sub Division Hospital thuam tha tura hmalak mek a nih thu a sawi a. Chhiat tawk chhungkuate chhawmdawl leh chhanchhuah kawngah NGO, khawtlang hruaitute leh mipuite inpekna chu fakawm a tih thu sawiin an chungah lawmthu a sawi a. Tin, Tlabung leh a chhehvel khaw hrang hrangah tuilian avangin kum tin harsatna leh tawrhna nasa tak a thlen thin avangin Tuipui hnaih tak hmun him lo a chengte a theih anga hmun him zawka an insawn chhuah theih nan hmalak tul a tih thu a sawi bawk. A sawi zelnaah Lunglei DC chuan Tripura relief camp-a cheng mek Bru chhungkuate hruai kir tura hmalak mek a nih thu leh an rawn letna tur khaw pali - Chawilung S, Dinthar, Putlungasih leh Buknuam ah te inpuahchahna kalpui mek a nih thu a tarlang.
Inkawmhona ah hian dan lova khaw din (unauthorized village) chungchang te pawh sawiho niin Lunglei DC chuan hemi chungchangah fimkhur leh awmze nei taka hmalak a tul thu leh Dan behchhan tlat a pawimawh thu kalkhawmte a sawipui.

He hunah hian kalkhawmte atangin an vei zawng leh ngaih pawimawh te ngaihthlak niin hmalak tlan dan tur an sawiho.

Hemi hnu hian lawnga kalin DC ho hian Serhuan leh Dinthar an tlawh a, khawtlang mipuite kawmna hun hman a ni.