3870/2023-2024

Lunglei; the 17th February,2024: DoNER Ministry-in One Time Special Assistance hnuaia cheng nuai Rs.114/- senga sak Safe House sak zawh tak chu vawiin khan, Lunglei DC Pi Ramdinliani hian tlawhin, a enkawl zuitu tur department kuta hlan hmaa enfiah ngai te a endik hmasa a, he building hi Tlabunga GAD-in a enkawl zui huna mamawh tur thil ṭûl dangte pawh a rang lama ngaihtuah dan kawng dap turin, Lunglei DC Pi Ramdinliani hian a satute a ngen nghal a ni.

Safe House hi fur tuilen laia insasengna tur hmun remchang nei lote inthiarluh lailawkna tur atan ruahman a ni a, tuiin a chim phak lohna tur hmun Tlabung Zawlpui venga Thangliana mual sir hmun remchang laiah chhawng khata sak a ni.

Hei bakah hian NABARD RIDF sum hmanga Tlabunga Supply Chhêk In sakna tur hmun pawh Lunglei DC hian a tlawh a nghal a, tuna Supply Godown awm sa bak, a dang sak belh a nih chuan ṭum khatah buhfai tam lehzual chhêk khâwl theih a nih tawh dawn avangin, Tlabung bakah a chhehvel khaw hrang hrangten an chhawr ṭangkai dawn hle tih a sawi.

Lunglei Additional DC Pu Donny Lalruatsanga,Pi Malsawmdawngliani,Sr.EE PWD(Building), Pi Lalhlimpuii Ralte  DCSO leh SDO (Sadar) ni leh SDC Malsawmhriatzuali ten Lunglei Bawrhsap hi an tawiawm a, Tlabung SDO (C) Pu H. Zonunmawia'n a lo dawngsawng a ni.