3609/2022-2023
Lunglei the 16th February, 2023 - Vawiin khan Lunglei District Bawrhsap thar Pi Ramdinliani, IAS chuan DC Conference Hall-ah Lunglei District media mi te kawmin inhmelhriatna hun an hmang a, Lunglei District hmasawnna tura hmalakna hrang hrang te a sawipui bawk.

Lunglei DC Pi Ramdinliani chuan media mite chu sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a. Uluk leh fimkhur taka thu ziak thin tur leh kumina election kan hmachhawn chhoh turah te reporting belhchian dawl leh dik, thlei bik neilo (responsible reporting) ngai pawimawh turin a ngen a ni.

Lunglei District hmasawnna turin theihtawp chhuah a tum thu Lunglei DC chuan sawiin DC chhuak ta Pu Kulothungan A in District hmasawnna atana CSR tangkai taka alo kalpui tawh chu chhunzawm chhoh ngei a tum thu a sawi a. District mipuiten ei leh bar kawnga harsatna an neihloh nan Fair Price Shop-te tih hmasawn a ngaih pawimawh takzet thu sawiin hemi kawnga hmalak chhoh a tum thu pawh a sawi a ni.

Lunglei District MJA President Pu Laltlanthanga leh media mi dangte pawhin thu sawiin an thil ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hun tha tak a buatsaih avangin DC chungah lawmthu an sawi a, media mite tana inhawng taka hnathawk duh mi a nih naah a chungah lawmthu an sawi bawk. Inkawmhona ah hian zirna, ei leh bar, sumdawnna, hmasawnna ruhrel leh kawng hrang hranga Lunglei District dinhmun te an sawiho a ni.

Vawiin Press Meet-ah hian Lunglei District media mi te an kal tha hle a ni.