3610/2022-2023
Lunglei the 16th February, 2023: Lunglei District Task Force for Elimination of Malaria chu vawiin khan an Chairman Lunglei DC Pi Ramdinliani kaihhruaiin Lunglei DC Conference Hall-ah an thukhawm.

Meeting-ah hian Malaria chungchanga Lunglei District dinhmun tlangpuite, malaria umbo tura sawrkar hmalakna kal mekte leh chak zawka Line Department leh pawl hrang hrang te nena tanruala hmalak ho theih dan tur hrang hrang te sawiho a ni.

Meeting-ah hian Lunglei District Malaria Officer & SMO Dr Lalrinthangi leh line department hrang hrang Agriculture, I&PR, LAD, Fisheries, leh Lunglei Sub Hqrs YMA aiawhte an tel a ni.

Lunglei DC Pi Ramdinliani chuan Lunglei District chu Mizorama Malaria tamna ber pahnihna ani chu pawi a tih thu sawiin Malaria do kawngah tih tur tam tak kan nei a ni, a ti a. Line department-te chu tangruala anmahni zawn theuha mawhphurhna tha taka hlen chhuak tura chahin mipuite zirtirna (awareness) chungchangah tan lak zual a tul thu a sawi a ni.

Pu Vanchamliana Chhangte, District Consultant, Vector Borne Disease Control Programme (VBDCP) chuan Lunglei District-a Malaria dinhmun leh hmalaknate presentation a nei a. Nikum chhung (January atanga December 2022) khan Lunglei District chhunga thisen test 36,551 atangin malaria vei mi 2890 hmuhchhuah niin an zinga 2356 te chu Malaria Pf niin 534 te chu Malaria Pv an ni a. Nikum chhung vek khan Malaria avanga nunna chan mi pahnih awmin February thla leh June thlaa boral an ni a, Lungsen PHC leh Tlabung SDH huam chhunga cheng te an ni. Lunglei District-ah Bunghmun, Lungsen leh Tlabung area-ah te case zat a tam bik hle a ni. January 2023 chhung khan Lunglei District-ah malaria case hmuhchhuah 135 a awm a ni.

Lunglei District-ah malaria mai bakah Dengue leh Chikungunya natna te pawh a darh thu tarlan a ni a. Nikum chhung (January atanga December 2022) khan sample test 754 atangin Dengue 61 hmuhchhuah niin hemi chhung vek hian sample 132 test atangin Chikungunya 34 hmuhchhuah a ni. Lunglei District Malaria Officer & SMO Dr Lalrinthangi chuan tun dinhmunah Lunglei District-a Dengue leh Chikungunya case te hi na tak (severe case) anla awmloh thu a report a ni.

Meeting-ah hian hmachhawp hrang hrang te sawiho niin Department-te hmalak tul te bituk an ni a. Agriculture Department chu kuthnathawktute zingah a zau thei ang berin awareness campaign lo kalpui se tih rel a ni a. Tui supply na leh tui dah khawlna ah te tui tling tih tlem nan PHE Department chuan hma lase tih a ni bawk a. Kawng siam labour te zingah malaria vei an tam thin avangin kawng siam hnathawkten thosilen an hman ngei theihnan PWD chuan hma lo la se tih an rel a. RD, LAD-te kaltlangin VCP-te nen tangkawpin hmalak bawk tih niin media leh I&PR te nen tang hovin awareness material hrang hrang buatsaih ni se tih an rel bawk.

Tin, malaria case report chak zawka kalpui anih theihnan Private hospital te nen tun aia in link tha zawk tura hmalak a tul thu leh reporting format te a thara in thawn leh tura rel a ni a. Lunglei District khawthlang lamah lawng hman fo a tul thin avangin hemi nei thei tur hian sawrkar emaw CSR kaltlanga ngaihven ni se tih meeting chuan a rel bawk.