3611/2022-2023
Lunglei the 16th February, 2023 - I&PR Department, Lunglei District leh South Art Mizoram te tangkawp buatsaih ni thum awh (13th – 15th February, 2023) ‘Lunglei Arts Festival, 2023’ Art & Culture Exhibition Hall, Venglaia neih chu nimin khan hlawhtling taka zawhfel a ni.

‘Lunglei Arts Festival, 2023’ ah hian Lunglei artist 26 ten an kutchhuak 100 chuang an pholang a. Lunglei District mipuiten an hlut hle a, tlawh tu tam tak awmin Lunglei District artist te kutchhuak lemziak 30 chuang hralh chhuah a ni. Art Festival-ah hian mipuite tan book stall, handmade items stall, Vocational Training Centre stall, face painting stall te hawn anih bakah artist te hian a hmunah mipui hmuh turin lemziakin Live Mural Painting an ti a ni.

Nimin chawhnu khan he Festival hi Lunglei DTO & BDO Pi Margaret J Vanlalremmawii’n Art & Culture Exhibition Hall-ah kharna hun a hmanpui a ni. Pi Margaret J Vanlalremmawii chuan ‘Lunglei Arts Festival, 2023’ chu Lunglei District tana rahbi thar pawimawh a nih thu sawiin hun lo kal zel turah nghawng tha tak an neih ngei a beisei thu a sawi a. Artist te chu khawtlang tana mi hlu an nih thu leh an thiamna te tangkai taka chhawr theih anih thu sawiin Mizo te pawhin an thiamna leh an kutchhuak te kan hlut thiam a tul takzet a ni, a ti bawk.

‘Lunglei Arts Festival, 2023’ Souvenir tlangzarhna hmun hman nghal niin participating artist te hnenah Souvenir leh Certificate hlan a ni.

Festival kharna program-ah hian Meanpeppervine Online Journal buatsaihin Poetry reading neih nghal a ni a. Lunglei District a poem ziaktu mi pali – Lalremruati Hrahsel, Vanmalsawmi, Lalthanliana Zongte leh Vanlalruata Pachuau ten an poem phuah te an chhiar a ni.