Vawiin khan Lunglei Bawrhsap thar Pi K. Lalrinzuali chuan a hna zawm tanin chawhnu dar 1:30 khan a office chamber-ah Lunglei District media mite kawmin inhmelhriatna hun an hmang a, Lunglei District hmasawnna tura hmalakna hrang hrang te an sawiho.

Pi K. Lalrinzuali chuan a office thar a luah luh ni ngeia Lunglei media mite nen inhmelhriatna leh inkawmhona hun tha tak an hmang thei chu lawmawm a tih thu a sawi a. Media mi te chu Lunglei District dinhmun hrechiang tu leh kawng hrang hranga District hmasawnna thlithlaitu leh viltu an nih avangin hun lo kal zel turah an thurawn leh finchhuahna te a mamawh tur thu a sawi a. Journalist-te chu kan ram inrelbawlna Democracy vawngnung zel turin an pawimawh takzet a ni tiin kan hma lawka Lok Sabha inthlan lo awm turah pawh mawhphurhna pawimawh tak an nei a ni tiin hmalak puiah a sawm a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a ni.

Lunglei District MJA President Pu H. Lalthansanga leh member dangte pawhin thu sawiin an thil ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hun tha tak a buatsaih avangin DC chungah lawmthu an sawi a, MJA tana inhawng taka hnathawk duh mi a nih naah a chungah lawmthu an sawi bawk.

Vawiin inkawmhona ah hian Lunglei Additional DC Pu Benjamin Lalzama, SDO (S) Pu Lalnundika, DIPRO Pi C. Lalremruati te an tel a. Lunglei District MJA-te an President Pu H. Lalthansanga hovin member thahnem tak an kalkhawm a ni.