Vawiin khan Lunglei DCC/DLRC/DLSC chu an Chairman Pu Ashish Madhaorao More, IAS, Dy.Commissioner, Lunglei hovin DC’s Conference Hall-ah an thukhawm a; December 2014 - March 2015 chhunga Bank hrang hrangte hnathawh an thlirho a ni.

Chairman Pu Ashish More chuan DCC/DLRC/DLSC member ten quarterly meeting an ngai pawimawh sawt hle avangin lawmawm a tih thu a sawi a, mipuite rawngbawl an ni tih hre renga tan la sauh sauh turin a fuih bawk. Bank kaltlanga sorkarin mipuite hamthatna tur scheme hrang hrang a kalpui mekah Lunglei chhunga Bank-te chu an hnathawh a tha thawkhat a, Education Loan an pekchhuahna kawngah erawh tan lak a ngai a ni a ti a. Mipuiten Bank kaltlang heng hamthatna awmte chu an hriatzau a tul a, hemi atan hian chanchinbu leh media dang hmanga mipuite hriattirna (advertisement) chhuah tam turin a hrilh bawk.

Tun dinhmunah Lunglei-ah Bank 8 - State Bank of India, IDBI, HDFC Bank, Axis Bank, Canara Bank, Apex Bank, Syndicate Bank leh Mizoram Rural Bank - te an awm mek a. Heng  Bank zawng zawng ten security tha tak an neih tawh thu leh CCTV leh alarm pawh vuah vek a ni tih meeting-ah tarlan a ni a. Kangmei laka inven nan a rang thei ang berin fire extinguisher vuah vek tura hrilh an ni bawk.

Vawiin meeting-ah hian Bank 8 leh line departments (Agriculture, Horticulture, DIC Industries, KVIC, Minor Irrigation leh DRDA) aiawhte an kal tha hle a. Lead Bank Manager Pu James L. Pachuau-in meeting agenda-te sawihawnna neiin quarterly meeting neih lehah chuan bank hrang hrang ten data felfai zawk thehlut thei se a duh thu a sawi bawk.