825/2026-2027

Lunglei, 2026 Nikir thla ni 3: Lunglei District Election Officer (DEO) Pi Navneet Mann chuan vawiin khan a hna thawh pindanah thu thar theh darhtute kawmin, Election Commission of India (ECI) bul tuma May ni 20, 2026 aṭanga September ni 6, 2026 inkar chhunga uluk zawka electoral roll siam ṭhat runpui, Special Intensive Revision (SIR) of Electoral Rolls kalpui meka Lunglei District-a hma lakna kal mek leh hmachhawpte a hrilhfiah.

Lunglei DEO Pi Navneet Mann chuan SIR chu elecoral roll-a chuang tur dik takte kim taka an chuan a, a chuang lo turte dah luh an nih lohna tur leh electoral roll dik leh felfai zawk a awm theihna tura kalpui a nih thu a sawi a. ECI leh Mizoram CEO aṭanga tih tur ruahmante chu Lunglei District-ah ṭha taka hlen chhuah zel a nih thu sawiin, May ni 30 aṭangin BLO-te'n an huam chhung in tinah kal chilhin electoral roll-a chuang mekte nihna kimchang chhinchhiahna, 'Enumeration Form' sem, dah khah leh lak khawm an kalpui mek thu a sawi a. Enumeration Form theh lutte aṭangin Draft Electoral Roll siam a nih dawn avangin mipuite'n ngaih pawimawh a ṭul thu sawiin, SIR chungchanga hma lakna hrang hrang leh mipui hriat tur pawimawh puanzar kawngah media mite thawhpuina leh ṭawiawmna a ngen nghal.

Lunglei DEO Pi Navneet Mann hi Election Officer Pi Lalhruaitluangi leh SDC Pu Deepak Godara te'n an ṭawiawm a. Thu thar theh darhtute hi Mizoram Journalists' Association (MJA) Lunglei District President Pu H. Lalthansanga'n hovin, Lunglei District-a SIR kalpui meka hriat tur pawimawh hrang hrangte an sawi ho va. Media mite'n hriat duh an neih an zawhte chu DEO leh official-te'n chhangin, hlawhtling taka SIR kalpui a nih theih nana rawtna hrang hrang an sawi ho bawk.

Vawiin vek khan DEO ho hian a hna thawh pindanah Election official-te, Electoral Registration Officer (ERO) leh Assistant Electoral Registration Officer (AERO)-te chuan SIR kalpui meka Enumeration Form sem, dah khah leh lak khawm kalpui mek dan thlir hovin, hlawhtling taka kalpui chhunzawm a nih theih nana ruahmanna leh ṭul hrang hrangte an sawi ho bawk.

Lunglei District hnuaiah Assembly Constituency paruk — 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui awmin, voter 1,03,037 an awm mek a. Polling Station 180 awmin, BLO 180, BLO Supervisor 28 leh Assistant BLO 64 an awm a. SIR atan hian political party hrang hrang ai awh Booth Level Agent mi 580 ruat an ni bawk.

Vawiin khan a ni 5-na atan BLO-te chuan Enumeration Form sem chhunzawmin, tlai dar 6 thlenga report a luh danin, Lunglei District-ah Enumeration Form 75,826 (73.59%) sem chhuah a ni tawh.