Lunglei Deputy Commissioner kal chhuak tur Pi K. Lalrinzuali, IAS chu vawiin chawhma khan a office chamber-ah Lunglei District MJA ten thlahna hun an hmanpui. He hunah hian Lunglei DC hi IAS a tlin lawmpuina citation an hlan nghal bawk.

Lunglei DC Pi K. Lalrinzuali chuan DC hna a chelh chhungin MJA, Lunglei District nen thawhhona tha tak an neih thu sawiin an tawiawmna zawng zawngah lawmthu a sawi a. Pi K. Lalrinzuali chuan Lunglei a awm chhunga thil tam tak a zir chhuah thu sawiin Lunglei District mipuite, NGO leh kohhran hrang hrang leh khawtlang hruaituten kawng engkima an tawiawmnaah an chungah lawmthu a sawi bawk. Lunglei District ti hmasawn zel tura thahnemngai taka theihtawp chhuah chhunzawm zel turin mipuite a chah a ni.

Hun kaihruaitu MJA Lunglei District President Pu H. Lalthansanga chuan Lunglei DC Pi K.Lalrinzuali’n nasa takin District hmasawn nan leh Lunglei mipuite tan hna a thawh thu sawiin a sulhnu te chu fakawm a tih thu a sawi bawk.

Vawiin vek hian Lunglei DC Office staff ten DC thlahna hun an hmang bawk a. Nimin chhun khan HPC Vice Chairman Pu Lawmawma Tochhawng, MLA hovin Lunglei DC hi HPC Member Secretary anih angin HPC Member ten thlahna hun an hmang bawk a ni. 

Pi K.Lalrinzuali hi a posting thar atan Director, School Education Department ah sawrkarin a dah a ni.