4143/2025-2026

Lunglei, 2026 Pawlkut thla ni 24: Vawiin khan K. Vanlalneiha (Serkawn) thawnthu bu pahnihna, Lalruanga Dawi Bur chu Lunglei District Information & Public Relations Officer Pu C. Lalhruaitluanga'n Jubilee Bible School Hall, Serkawnah a tlangzarh.

Lehkhabu tlangzarhtu Pu C. Lalhruaitluanga chuan tun laiah internet leh social media-in ni tin nun a thunun tawh avangin lehkhabu chhiar leh ziak a har tawh thu sawiin, lehkhabu hlutna chu la tlahniam lovin, la pung deuh deuh mah se, a hluttute leh kan hlut dan a tlahniam zel tih a sawi a. Thu leh hla peng hrang hrang zingah thawnthu chu phuah chawp leh thutak pai lo anga ngaih leh hnualsuatna a awm ṭhin tih sawiin, mi thiamte'n thawnthuin mihring nun dik tak tar lang a, zirtirna ṭha tak a ken tel ṭhin thu an sawi chu a dikzia a lang zel tih a sawi a. Lalruanga Dawi Bur ang chi, ngaihruatna khawvela innghat thawnthu phuah nan Mizote hmasang thawnthua changtu mi chungchuang leh ropui tak tak chu hmanruaa hman ṭangkai a, vawrh lar zel ṭha a tih thu sawiin, Mizo ram leh hnam aṭangin chuti ang thawnthu ṭha chu lo chhuah belh zel se, lehkhabu ziak leh chhiar lamah hmasawnna awm zel se a duh thu a sawi.

Pu K. Zodinsanga chuan hun kaihruaiin, Mizo Academy of Letters (MAL) Joint Headquarters Lunglei President Upa C. Hrangdula'n hunserh a hmang a. MAL Joint Headquarters Lunglei Secretary Pu TC Jonunsanga chuan lehkhabu thlir lawkna hun hmangin, Pu R. Lalrosanga, Tv. Isak Roluahpuia leh sawm bikte aṭangin thu sawi ngaihthlak a ni a. Lehkhabu ziaktu K. Vanlalneiha'n lawm thu sawiin, Pu F. Lalrotluanga'n ṭawngṭaiin hun a khar.

Lalruanga Dawi Bur hi hmasang thawnthua thil thleng behchhana thawnthu phuah (Fantasy/Science Fiction) niin, phek 301-a chhah a ni a. Pi K. Lalmalsawmi (Serkawn) chhuah niin, KL Offset Printers (Upper Khatla, Aizawl) te chhut a ni a. Chhut khatnaah hian copy 500 chhut chhuah niin, a man ₹250 a ni.