4144/2025-2026

Lunglei, 2026 Pawlkut thla ni 24: Nimin khan Lunglei District Election Officer (DEO) Pi Navneet Mann hovin a hna thawh pindanah National Voters' Day (NVD) vawi 16-na puala hun hman a ni.

Lunglei DEO Pi Navneet Mann chuan kal khawmte chu NVD vawi 16-na chibai bukin, duhthlanna thiang tak nena mahni ai awh thlan theih chu chanvo hlu tak a nih angin India ram mipui rorelna vawn nunna kawnga thawktu nih tum ṭheuh turin kal khawmte a chah a. Kuminah ram pumah electoral roll endik runpui ngawrh taka kalpui a ni dawn tih sawiin, electoral roll dik, felfai leh thianghlim tak a awm theih nana thawktute thawhpui turin political party hrang hrangte chu a sawm nghal bawk.

He hunah hian Election Officer Pi Lalhruaitluangi chuan roll endik runpui, Special Intensive Revision (SIR) kalpui dan tur tlangpui a sawi fiah a. SIR hnuhnung ber chu kum 2005 kuma mi kha a nih tawh thu sawiin, kum tin a pangngaiin roll endik chu kalpui reng ni mah se, ngawrh leh uluk zawka SIR kalpuina chu kum 20 lai a liam tawh avangin siam ṭhat ngai tam tak a awm tawh a rinawm thu a sawi a. Electoral roll dik lo palh chhui chhuak turin in tinah luta endik tur a nih thu te, form dah khah leh lehkha pawimawh thil tel a ngaih tur thu te sawiin, political party, tlawmngai pawl leh mipuite chu ṭha taka Booth Level Officer (BLO)-te lo thawhpui a, lo ṭawiawm turin a chah.

He hunah hian sawrkar official-te, political party leh tlawmngai pawl ai awhte an tel a. Kal khawmte'n NVD thutiam an chham rual bawk.

National Voters' Day hi kum 2011 aṭang khan hman ṭan niin, kum tin January ni 25-ah hman ṭhin a ni a. Kumin hian a ni tak hi Pathianni a nih avangin nimin khan a lawmna hun hi buatsaih a ni a. India rama inthlan buatsaih tura Danpui hnuaia din, Election Commission of India (ECI) chu January 25, 1950, India Republic Day hma ni chiahah khan din niin, chu ECI din ni chu National Voters' Day atan hian hman a ni.