1568/2026-2027

Lunglei, 2026 Vawkhniahzawn thla ni 29: Electoral roll en nawn runpui, Special Intensive Revision (SIR) 2026 kalpui mekah Lunglei District-a Assembly Constituency parukah Electoral Registration Officer (ERO) leh Assistant Electoral Registration Officer (AERO)-te'n ngawrh takin hearing an kalpui mek.

Lunglei District-ah hian Assembly Constituency paruk – Lunglei North, Lunglei East, Lunglei West, Lunglei South, Thorang leh West Tuipui te awmin, polling station 181 a awm a. Lunglei District-a Draft Electoral-a hming chuang mi 98,808 aṭangin mi 21,549 chu ERO leh AERO-te hmaah an nihna finfiah turin hearing tura kohna (notice) pek an ni a. Hearing tura kohte hi kum 2005 SIR-a zawmpui nei lo (no mapping) mi 2,261; an inziah dana felhhlel awm (mapping with discrepancies) mi 18,441 leh ERO/AERO-te'n rinhlelhawm leh enfiah ngaia an ruat mi 847 an ni a. July ni 29, 2026 zing dar 10:00 thlengin he'ng zinga mi 4,475 chu hearing-ah hian an inlan tawh.

SIR 2026 hearing kalpui mekah hian Draft Roll-a chuang hearing tura kohte bakah, July ni 4, 2026-a Draft Roll tihchhuah hnua electoral roll-a inthun thar, inpaih, insawn leh siam ṭhat dilna lutte chu endik nghal a ni bawk a. Inthun thar, inpaih, insawn leh siam ṭhat dilna hun hi August ni 4, 2026 thleng hawn a ni ang.

SIR 2026 hearing kalpui mekah hian July ni 29, 2026 thlengin Lunglei District-a polling station 181 zinga polling station 88-ah hearing hi zawh tawh niin, Lunglei North-a PS 28 aṭangin PS 15; Lunglei East-a PS 24 aṭangin PS 17; Lunglei West-a PS 24 aṭangin PS 9; Lunglei South-a PS 40 aṭangin PS 22; Thorang-a PS 36 aṭangin PS 15 leh West Tuipui-a PS 29 aṭangin PS 10-ah te hearing zawh zawh tawh a ni a. ERO leh AERO-te'n khaw tinah kal chilhin hearing hi an buatsaih a. Booth Level Officer (BLO)-te, Booth Level Assistant (BLA)-te, Local Council leh Village Council te, tlawmngai pawl hrang hrang – YMA/YCA, MHIP, MUP, adt. te'n hearing-ah hian an telpui ṭhin bawk.