No.6870/2020-2021 

Lunglei District Level Task Force on Covid-19 chu an Chairman Lunglei DC Pu V.Lalsangliana, IAS kaihhruaiin Lunglei DC Conference Hall-ah vawiin khan an thukhawm. Meeting-ah hian Lunglei District-a Covid-19 hrileng laka invenna hmalakna kal mek, dinhmun tlangpui leh hmalak tul te sawiho a ni. Meeting-ah hian Lunglei SP Pu Stephen Lalrinawma, CMO Dr Lalthlamuana leh DLTF member dangte, leh VLTF member sawm bik te an tel a ni.

Lunglei DLTF meeting-ah hian Lunglei District-ah Covid-19 hrileng a darh zel lohna tura hmalak tul te sawiho a ni a. Covid-19 Testing Centre tur chungchang leh Krismas leh Kumthar vuakveta duty dan tur chungchang pawh rel a ni. Covid-19 volunteer-te chungah DLTF chuan lawmthu sawiin DLTF Donation dawn atangin Krismas pualin lawmman pek nise tih an rel a ni.

DLTF Chairman Lunglei DC Pu V.Lalsangliana chuan Covid-19 hrileng do kawngah sawrkar leh VLTF-te tangkawp chuan tha thlah lovin theitawp an chhuah chhunzawm zel dawn a ni tiin mipuite pawhin he hri laka invenna kawnga tih tur leh tih loh tur te fimkhur taka kan zawm zel a tul a ni, a ti.

CMO Dr Lalthlamuana chuan Lunglei District report pein tun dinhmunah Lunglei District-ah quarantine tawh mi 4,944 awmin hengte hi sawrkar quarantine facility ah mi 2771, home quarantine 1244, Company Quarantine 113 leh Army/Airforce hmuna in quarantine 816 an ni. Lunglei District-ah Covid-19 positive mi 350 (mipa – 317 leh hmeichhia 33) hmuhchhuah tawh niin an zinga mi 249 (71.14%) chu police (MAP) leh military leh paramilitary force mi te niin a bak zawng chu construction worker (Hnam dang) mi 12, frontline worker pakhat (1), Civil mi (Mizo) 54 leh Civil mi (Hnam dang) 34 an ni. Tun dinhmunah Lunglei District-ah khunghran mi 321 awmin Covid-19 positive enkawl mek mi 34 an awm a ni. Vawiin thleng khan Lunglei District atangin sample 10,051 (Rapid Antigen Test – 3700, Truenat – 4813 leh RT-PCR @ ZMC - 1538) test tawh a ni.

01.12.2020 atanga ni 10.01.2021 thleng awh "C0VID-19 No Tolerance Drive" hman mek chu Lunglei District-ah khauh taka kalpui mek niin veng hrang hranga duty tur sawrkar hnathawk Covid-19 Executive Duty list thar pawh vawiin khan peih fel a ni a. No Tolerance Drive neih tan atanga vawiin thleng khan Lunglei District-ah dan bawhchhia mi 1027 man tawh niin fine cheng 1,25,700 a tling khawm tawh a ni. Krismas leh Kumthar vuakvetah duty ngawrh zawka kalpui tum niin karleh hian VLTF-te leh Sub Hqrs YMA te nen thutkhawmna neih leh tum a ni. Lunglei SP Pu Stephen Lalrinawma chuan Narcotic Control Bureau, New Delhi hmalaknain karleh 15th December atangin kar khat awh ruihhlo do Special Drive neih anih tur thu a sawi bawk.

Lungleia Covid-19 Testing Centre hman mek chu a hmunhma a that tawkloh avangin hmun dang zawn ni se tih vawiin committee chuan a rel a. Lunglei khawpui chhunga hmun remchang engemawzat sawilan niin DC, CMO leh member dangten an hmunah kala an enfiah hnuah Covid-19 Testing Centre thar hi ruat a ni ang.