No.2583/2020-2020 

Lunglei District-a COVID-19 positive case 45 te chu an swab sample endik nawn a nih hnuin an negative vek tih hmuh chhuah a ni a. Vawiin khan dam taka chhuahtir an ni. 

Covid -19 vei enkawl dam te hi kum 18 atanga kum 33 inkar a upa niin mipa 29 leh hmeichhia 16 an ni a, 44-te hi CCC, Lunglei Government College atanga chhuak niin pakhat (1) hi DCHC, ETC SIRD Pukpui atanga chhuak a ni. Vawiinah mi 45 an chhuah hnu hian tun dinhmunah Lunglei District-ah Covid-19 vei mi pahnih (2) la awm mekin DCHC, ETC SIRD Pukpui ah enkawl an ni.

Covid-19 dam chhuak te pualin vawiin dar 11 khan CCC, Lunglei Government College-ah thlahna program Lunglei DC Pu V.Lalsangliana, IAS hovin hman a ni a. Lunglei Bawrhsap chuan Lunglei District-a Covid-19 vei mi 45 zet ten dam taka CCC leh DCHC an chhuahsan thei chu Lunglei District leh Mizoram pum tan thil lawmawm leh chhinchhiah tlak tak a ni tiin Covid-19 positive te enkawlna kawnga theihtawp chhuaha chhun zan zawma hnathawktu medical team-te, magistrate-te, security-te, cook-te leh staff dangte thawhrimna leh inpekna avangin an chungah lawmthu a sawi a. Phal taka an College infrastructure Covid Care Centre-a hman tir tu Lunglei Government College hnenah leh College Veng, Lunglei khawtlang chungah lawmthu a sawi bawk. 

Covid-19 positive enkawl dam thalaite hnenah fuihna thu sawiin Lunglei DC chuan hun harsa tak an paltlang tak chu anhmahni theuhah chakna thar, tumruhna leh mahni inrintawkna pe tu niin, an zirna leh hnathawhnate tha taka an chhunzawm thuai theih nan duhsakna a hlan a ni. Tin, Covid-19 positive dam chhuak te chu thinhrik lo turin mipuite a chah nawn bawk a ni. 

Vawiin program hi Lunglei CMO Dr Thani Pachuau in kaihruaiin Lunglei Medical Superintendent Dr SR Ngurchamliana’n thu sawina leh tawngtaina hun a hmang a ni. Vawiin dar 1:00pm ah khan CCC, Lunglei an chhuahsan fel a ni. Vawiina chhuak te zingah hian mi Tlabung Sub Division mi 23 awmin an ni hi MST Bus in thlah an ni. Tin, Disinfection Team-ten helai hmun hi damdawiin an kap thianghlim nghal a ni. 

Vawiina mi 45 chhuak ta te hi dama chhuah an nihna lehkha (discharge certificate) hlan theuh niin an chhuah hnu hian ni sarih (7) chhung mahni in lama inkhung hran chhunzawm rih tur leh, hemi chhung hian pawn chhuak lo va, inleng pawh kawm lo va, mahni chhungte nen pawh fimkhur taka khawsa ho turin thu rawn an ni a. Fimkhur tura tih an nih rual hian mi dang tan hlauh tur leh thinhrik chhan tur a awm lo tih medical lam chuan an sawi.