1239/2026-2027

Lunglei, 2026 Vawkhniahzawn thla ni 1: February ni 28 aṭanga May ni 31, 2026 inkar chhunga India ram puma chhul hmawr cancer thlentu Human Papillomavirus (HPV) laka invenna tur vaccine a thlawna pek runpui kalpuiah Lunglei District-a hmeichhe tleirawl kum 14 aṭanga kum 15 inkar target 1,243-ah tleirawl 1,326 (107%) chu HPV Vaccine hi pek an ni.

HPV Vaccine pek runpui hi thla thum chhung kalpui niin, hmeichhe tleirawl kum 14 pumhlum tawh, kum 15-na hmang mekte hnenah ni tin damdawi in (health facilities) hrang hrang — PHC, UPHC, SDH leh DH-ah te pek ṭhin a ni a. Lunglei District-ah chuan Sub-District Hospital 1 (Tlabung), UPHC 2 (Sazaikawn leh Hrangchalkawn) leh PHC 5 (Buarpui, Bunghmun, Haulawng, Lungsen leh Ṭawipui South)-ah te HPV Vaccine hi pek niin, thla thum chhung hian Lunglei District-a tleirawl 1,326 chu HPV Vaccine hi pek an ni.

Tun dinhmuna HPV Vaccine hman mek hi GARDASIL niin, HPV Strain pali — 6, 11, 16 leh 18 te laka venna a ni a, vawi khat chiu (single dose) zela pek a ni.

Chhul hmawr cancer venna vaccine a thlawna pek a nih bakah hian, chhul hmawr cancer endikna (screening) hi Health & Wellness Centre leh a chung lam damdawi inahte a thlawna kalpui mek a ni bawk.

Chhul hmawr cancer hi India rama hmeichhe cancer hluar ber dawttu niin, kum tin mi 1,20,000 (nuai khat sing hnih) velin vei thar leh mi 80,000 (sing riat) velin thihpui anga chhut a ni a. Hemi ven nan hian HPV Vaccination Programme hnuaiah hian India ram pumah kum tin hmeichhe tleirawl kum 14 mi vaibelchhe 1.15 chu HPV Vaccine hi pe tura ruahman niin, kumin hian HPV vaccine pek runpui hi kalpui ṭan a ni.

Lunglei District-a Health Department hotute chuan District Bawrhsap bakah, department leh pawl hrang hrang ṭawiawmna an dawn ṭhat thu leh village council (VC) hrang hrangte'n an khuaa tleirawlte'n PHC-a vaccine an lak theih nan man chawia motor hman tur an ngaihtuahsak ṭhin thu te sawiin, HPV Vaccination Campaign-a target khum a nih theih chhan hi Senior Chief Medical Officer (SCMO) leh a thawhpuite, District Education Officer leh a thawhpuite, department hrang hrang, tlawmngai pawl leh khawtlang hruaitute thawh hona vang a nih thu an sawi a. Tha thawhtu leh anmahni thawhpuitute zawng zawng chungah lawm thu an sawi