DIRECTORATE OF INFORMATION & PUBLIC RELATIONS, Government of Mizoram, India

4210/2024-2025

Lunglei, 2025 Ramtuk thla ni 12: February ni 13, 2025 (Ningani)-a village council (VC) inthlanpui vote thlakna tur, Lunglei District chhunga VC02030-Lalnutui VC Constituency-a inthlan buaipui tur polling party te chuan vawiin chawhma dar 10 khan Lunglei Bawrhsap pisa tual aṭangin an duty-na tur hmun an pan.

Lalnutuiah hian vanduaithlak takin VC candidate thi a awm avangin vawiinah a nawlpui ruala inthlan buatsaih hman a ni ta lo va. Naktuk zing dar 7 leh tlai dar 4 inkarah inthlan hi buatsaih tura ruahman a ni.

Vawiina tirh chhuah Lalnutui polling party te hian DC office-a despatch counter aṭangin inthlan buatsaihna tur hmanrua leh bungruate lam khawmin, an bungruate an endik fel vek hnuah an duty-na tur hmun hi an pan a. Polling party-ah hian inthlan huaihawttu tur Returning Officer (RO)-te, inthlan buaipuitu tur Presiding Officer (PRO), leh Polling Officer (PO)-te, venhimna hna thawk tur security-te leh lirthei khalhtute an tel a ni.

Lalnutui VC-ah hian seat 3 (general seat 2 leh reserved seat 1) awmin, inthlan chuhtu candidate mi 10 (general seat-ah 8 leh reserved seat-ah 2) an awm a. Indian National Congress (INC) candidate 2, Mizo National Front (MNF) candidate 2, Zoram People's Movement (ZPM) candidate 3 leh Independent candidate 3 an awm a ni.

Lalnutuiah hian vote nei mi 192 (mipa 94 leh hmeichhia 98) an awm a ni.

Attachment