DIRECTORATE OF INFORMATION & PUBLIC RELATIONS, Government of Mizoram, India

4209/2024-2025

Lunglei, 2025 Ramtuk thla ni 12: Lunglei District chhunga village council (VC) leh local council (LC) Inthlanpui 2025 buatsaihah tukin, February ni 12, 2025 (Nilaini) zing dar 7:00 aṭangin ballot paper hmangin vote thlak ṭan a ni a, chhunlai dar 12:00 thleng khan vote awm zawng zawng 92,669 aṭangin vote 30,856 (33.30%) a tla tawh.

Lunglei District Election Officer Pi Navneet Mann chuan inthlan kalpui dan enfiahin Lunglei Municipal Council (LMC) huam chhunga local council (LC) inthlan vote thlakna polling station hrang hrang a tlawh kual a. Inthlan tluang taka kalpui a ni leh mipui vote thlak tur an chhuak ṭha chu lawmawm a tih thu a sawi.

Lunglei District-a VC leh LC inthlan hi thlithlai leh vil tura State Election Commission (SEC)-in a ruat observer pathum te chuan ṭhut chilhin, an vil bawk a. Election observer-te hi LMC huam chhungah Cooperative Societies Registrar Pu John LT Sanga, Lunglei District south zone-ah Rural Development Department Joint Director Pu Vanlalrova leh Lunglei District north zone-ah FCS&CA Department Joint Director (Admin) Pu Victor Lalawmpuia te an ni.

Lunglei District-a VC 88 leh LC 24 awmah VC pahnih (seat 3 ve ve awmna) - VC02058-Sailen leh VC02065-Sumasumi-ahte chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC02030-Lalnutui-ah vanduaithlak taka candidate thi a awm avangin February ni 13, 2025 (Ningani)-a vote thlak turin ruahman a ni bawk a. Vawiin khan VC 85 leh LC 24-ah, seat 483 (general seat 354 leh reserved seat 129) atan polling station 162 (VC 111 leh LC 51)-ah inthlan hi buatsaih niin, naktukah VC 1-ah, seat 3 (general seat 2 leh reserved seat 1) atan inthlan buatsaih a ni ve leh ang.

Lunglei District-a VC 88 leh LC 24-ah hian a duh apiangin an chuh theih general seat 360 leh hmeichhe tana hauh reserved seat 132, a zavaiin seat 492 a awm a. Inthlan chuhtu candidate zawng zawng hi mi 1,438 (general seat-ah 1,064 leh reserved seat-ah 374) niin, Bharatiya Janata Party (BJP) candidate 38; Indian National Congress (INC) candidate 341; Mizo National Front (MNF) candidate 431; Zoram People's Movement (ZPM) candidate 478 leh Independent candidate 150 an awm a ni.

Vawiina inthlan vote thlakna VC 85 leh LC 24-ah hian vote nei mi 92,669 (mipa 45,767 leh hmeichhia 46,902) an awm a. Chhunlai (dar 12) thlengin vote 30,856 (mipa 15,201 leh hmeichhia 15,655) tlain, vote awm zawng zawng aṭangin 33.30% tla tawh ang a ni.

VC 85-ah hian voter 51,458 (mipa 26,404 leh hmeichhia 25,054) awmin, chhunlai thlengin vote 17,441 (mipa 8,866 leh hmeichhia 8,575) a tla tawh a. Vote tla zawng zawng hi 33.89% a ni.

LC 24-ah voter 41,211 (mipa 19,363 leh hmeichhia 21,848) awmin, chhunlai thlengin vote 13,415 (mipa 6,335 leh hmeichhia 7,080) a tla tawh thung a. Vote tla zawng zawng hi 32.55% a ni.

VC leh LC Inthlanpuiah hian tlai dar 4 thlengin vote thlakna hun hawn a ni a. Vote tlate hi vote thlak zawh fel hnu zan lamah, zan dar 7 aṭangin polling station hmun ṭheuhvah chhiar nghal a ni ang.

Attachment