Nimin khan Lunglei DC Pi Lalzarmawii, IAS kaihhruaina in DC Bangla-ah Sentut leh Sentet (Measles & Rubella) invenna vanccine naupang thla 9 atanga kum 15 inkarte hnena pek dan tur ngaihtuahin thutkhawmna neih a ni. He hunah hian hemi chungchang ngaihtuah tura Mizorama cham mek UNICEF leh World Health Organization palaite leh a kaihhnawih sawkar Department hrang hrang hotute an tel.

 Dr. Subhajit Bhattacharjee, WHO leh Daya Shankar Singh, UNICEF te chuan Lunglei DC chu kawmin Measles leh Rubella laka invenna beihpui thlak tura Lunglei Distrit inpuahchahna kal mek an sawipui a. Measles Rubella Vaccination Campaign hi April thla chhunga zawhfel turin ruahmanna siam mek a ni a, Lunglei District inpuahchahna Micro Plan pawh peih fel tawh niin Health Department, Education Department leh Social Welfare Department tangkawp ten zirtirtute leh zirlai nu leh pa te tan hemi chungchang inzirtirna training an buatsaih dawn a ni.

He hunah hian Education Department leh Social Welfare lam hotute nena thawh ho dan tur te, Ministry of Health & Family Welfare lamin Operational Guidelines an lo siam anga he vaccine pek hi kalpui a nih theih dan tur chi hrang hrangte sawiho a ni bawk.

Measles Rubella Vaccination Campaign hi Sawrkar Laipui hmalakna niin naupang thla 9 pumhlum atanga naupang kum 15 la pumhlum lo zawng zawng he hri danna hi pek tur a ni. A hma lawka Vaccine lo la tawh emaw sentut lo vei tawh pawh ni se he Campaign lai hian Vaccine an lak leh vek a ngai a ni.

Sentut hi natna inkaichhawn awlsam tak, Virus vanga awm a ni a. Naupang kum 5 tlin hmaa sentut danna (Measles Vaccine) vawi hnih a lak chuan he natna atangin a him a ni. Rubella hi Sentut aia na lova lang chhuak, mahse inkaichhawn awlsam tak si, nu naupai-in a vei phei chuan nau a chhiat emaw piangsual sa a hrin tir theitu a ni. Nu naupaiin Rubella a vei chuan nau thi saa a pian loh pawhin nau ian tirha bengawng, pian tirha mitdel, Lung insiam diklo leh thluak insiam puitlinglo tein nau a hring thei a ni.

He Campaign-ah hian School naupangte leh zirtirtute zawng zawng an tel vek theih nan Health leh Education Department chu an tangrual a. School zawng zawng  sawrkar leh Private School-ah te lehkha pek chhuah tawh an ni.