Vawiin khan Art & Culture Auditorium, Lungleiah National Commission for Women, New Delhi leh Mizoram State Commission for Women (MSCW) tangkawp chuan India Danpuiin hmeichhiate humhalhna Dan a siamte zirhona hun “Legal Awareness on Laws related to Women” an buatsaih a. Lunglei DC Pi Lalzarmawii, IAS chu khuallian niin he hun hi a hawng a ni.

He hun Professor Lalneihzovi, Member, MSCW kaihhruaiah hian Pi Lalzarmawii chuan hmeichhiate dikna leh chanvo chungchanga zirhona buatsaih a ni chu lawmawm a tih thu sawiin, Mizoram State Commission for Women te hmalakna chu fakawm a tih thu a sawi a ni. India Danpui chuan hmeichhia leh mipate intluktlanna tur leh hmeichhiate dikna leh chanvo humhalh a nih theih nan Dan hrang hrang a duang a ti a. Mizoramah pawh hemi kawngah nasa taka hmalak chhoh a ni tiin, kum 2014 khan Dan mumal tak The Mizo Marriage, Divorce and Inheritance of Property Act, 2014 chu siam a ni, a ti. Heng Dan te hi a bik takin hmeichhiaten an zirchian a pawimawh a ti a. Kalkhawmte chu zirtirna ngun taka ngaihthla a, hlawkpui ngei tum theuh turin a chah bawk a ni.

Pi M. Zohmingthangi, IAS (Retd), Chairperson, MSCW pawhin thu sawiin tunlai khawvel changkang chho zelah Dan in hmeichhiate dikna leh chanvo a humhalh dan mipuiten kan hriat tlan a tul takzet a ni tiin hemi kawnga hmalakna ah hian mipate nen kan tanrual a tul a ni, a ti a. Hmeichhiate harsatna hrang hrang sukiang tur leh an hmasawn theihna turin MSCW chuan  theih ang tawka hma a lak thin thu sawiin, nasa taka hmalak chhunzawm zel a tum thu a sawi a ni. Mizoram District Capital hrang hrang ah Legal Awareness Programme chu buatsaih chhunzawm zel a nih tur thu a sawi a. He programme chhim tura mipui thahnem tak lo kalkhawmte chu an hlawkpui nan duhsakna a hlan nghal bawk a ni.

Pi Zodinthangi, Member Secretary, MSCW chuan MSCW thiltum tlangpui leh hmalakna hrang hrang sawizauna hun a hmang a, Pi Sylvie Z. Ralte, CJM Kolasib leh Member MSCW ni bawk chuan lawmthu sawiin hun a khar a ni.

“Legal Awareness on Laws related to Women” programme ah hian sawrkar official-te, tlawmngai pawl hrang hrang aiawhte, khawtlang hruaitute leh zirlai thahnem tak an kalkhawm a. Pi Sylvie Z. Ralte, CJM Kolasib chuan ‘Hmeichhiate dan in a humhalh dan’ tih thupui hmangin zirtirna a pe a ni. Pi Lalrinkimi Hmar, DCPO, Lunglei chuan POCSO Act 2012 chungchangah zirtirna a pe a. Professor Lalneihzovi, MZU chuan ‘Hmeichhiate leh Khawtlang inrelbawl dan’ tih thupui hmangin kalkhawmte zirtirna a pe bawk a ni.

 

Attachment

  • Loading attachment...