Vawiin (21.3.2018) hian World Forestry Day 2018 pualin Tlabung Forest Division leh Tlabung branch YMA te chuan Khawthlangtuipui-a Vantaikhawr hmun, No Fishing zone hmunah hun an hmang.

He hun hi Pu K Zaliana, RO chuan a kaihruai a, Pu PC Lalthankima, ACF chuan hemi ni puala Chief minister thuchah a chhiar chhuak a. Pu PC Laltanpuia, DFO chuan thu sawiin "Thing phun hi uar lutuk a awm theilo, Birthday leh anniversary hrang hrang puala thing phun hi intih hmuh a tul a ni" a ti. Tlabung branch YMA ten No Fishing zone an siam chu lawmawm a tih thu leh harsatna karah pawh bei zui zel turin a chah a, Sangha chaw lei nan Rs 5000.00 a hlan bawk.

He hunah hian Tlabung YMA lam tangin No fishing zone siam a nih chhoh dan ngaihthlak a ni a, tun dinhmunah hian YMA memberte group thumah inthenin zantin an in duty tlaivarchhawk thin. No Fishing zone area hian luidung Km chanve vel a huam a, tun dinhmunah hian Sangha pawh an pung chak tan hle a, No fishing zone area pawn lamah pawh Sangha man tur a tam phah tan mek bawk.

He hunah hian MHIP aiawh te pawh an tel a, program zawh hian No fishing zone huamchhung Lawnga fang kualin Sangha chaw an pe nghal bawk.