Vawiin khan Gauhati High Court Judge, Justice Prasanta Kumar Deka chuan Mizoram State Legal Services Authority (MSLSA) buatsaih Legal Service Camp chu Chanmari YMA Hall ah a hawng.
Justice Prasanta Kumar Deka chuan Legal Camp neih chhan sawiin khua leh tui kan nih anga dikna chanvo kan neih te leh sawrkarin khua leh tuite tana hamthatna a siam te a dawng tur dik takin an dawn theih nan kawng kawh hmuh a tum a ni, a ti. India khua leh tui zawng zawng hian India dan pui hnuaiah dikna chanvo leh sawrkar laka tih tur kan nei nghal a, kan dikna chanvo te, sawrkar leh midangte laka kan mawhphurhna danin a siam te hi thil kal kawp tlat leh tum thuhmun a ni a ti a. Kan dikna chanvo chauh hria a, kan tih ve tur lam hlamchhiah hi thil dik a ni lo va, kan dikna chanvo te hi midangte tana hnawksak zawngin kan hman a thiang lo a ni a ti bawk. Chutianga kan dikna chanvo leh tihtur te hrilhhriat hi Legal Services Authority in a tum ber a ni a, sum leh pai neih loh avanga miin a dikna chanvo a hloh mai loh nan National Legal Services Authority Act, 1987 hi din niin a sawi bawk. Khuallian chuan India ram state tinah State Legal Services Authority awmin, District hrang hrangah District Legal Services Authority an awm leh vek a, hingtlang khaw tin leh vengtin deuh thaw- ah Para Legal Volunteers te awmin, chung mite chuan dik taka rorelna a awm theih nan harsatna nei te an lo pui a, a tul a nih chuan Court ah te an harsatna te an thlenpui thin a ni ,a ti.
Khual zahawm Aizawl Mayor Pu PC Lalhmingthanga chuan sawrkar laipuiin scheme leh program a siamte hi khua leh tui kan nih angin mipuite chan tur a ni a, kan chanvo dik tak kan chan theihna tura hriat zauna tur remchang Mizoram State Legal Services Authority in Mizoram District tina a buatsaih chu lawmawm a ti a, mipuiin an hman tangkai a beisei thu a sawi a ni. AMC Mayor hian Victims of Crime Compensation hnuaia tanpuina pawisa fai Rs.38,5,4000/-(Nuai sawmthum pariat, singnga leh sang li) mi 14 hnenah a sem nghal bawk. He Compensation latu zinga kum 18 la tling lo te hi an Bank account ah an sum lak tam zawk hi deposit sak an ni a, kum 18 an tlin hunah an la thei dawn a ni.
Legal Services Camp ah hian stall 20 zet hawn a ni a. Heng stall-ah hian mipui ten zawhna chi hrang hrang an hriatthiam loh leh hriatduh te an zawt a ni. He programme hi National Legal Services ruahhmanna anga kal pui a ni a, mipui ten an tana sorkar dept hrang hrangin hmathatna a siam te an hriat a, an chhawr tangkai theih nan a duan a ni.
Legal Services Camp hawnna inkhawm hi Mizoram State Legal Services Authority Member Secretary Pu Vanlalenmawia’n a kaihruai a. Aizawl District Legal Services Authority Pi R.Lalduhawmi’n lawmthu sawina hun a hmang thung.
