766/2026-2027

Lunglei, 2026 Ṭomir thla ni 29: Vawiin khan Lunglei District Election Officer Pi Navneet Mann hovin a hna thawh pindanah Election official-te, Electoral Registration Officer (ERO) leh Assistant ERO-te, District Media Nodal Officer (DMNO) leh Assistant DMNO te an ṭhu khawm a. Lunglei District-a ngawrh zawka electoral roll siam ṭhat runpui, Special Intensive Revision (SIR) kalpui meka inbuatsaihna hrang hrang thlir hovin, hlawhtling taka SIR kalpui a nih theih nana thil pawimawh hrang hrang leh hmachhawpte an sawi ho.

DEO Pi Navneet Mann chuan SIR chu thil thleng zen zen lo a nih avangin tun ṭuma mi hi remchang leh tawn hriat ṭha tak a nih thu sawiin, SIR chu ngaih pawimawh hmasakah neih a, a hlawhtlin nan phur tak leh thatho taka hma la turin mawhphurhna hrang hrang neitute chu a chah a. Electoral roll-a chuang thei dik takte hmaih an nih lohna tur leh a chuang lo turte an chuan lohna turin fimkhur tak leh uluk taka hma la turin mawhphurtute a chah.

He hunah hian SIR kalpui meka May ni 30 aṭanga June ni 28, 2026 inkar chhunga electoral roll-a chuang tawhte chanchin kimchang lak khawmna (enumeration) kalpui tura ruahmanna thlir ho a ni a. Inbuatsaihna peih fel tawh niin, BLO training pawh buatsaih tawh a ni a. Voter-te chanchin chhinchhiahna tur Enumeration Form chu Booth Level Officer (BLO) te kutah hlan fel tawh niin, May ni 30 aṭangin BLO-te'n in tin tlawh chhuakin Enumeration Form hi an sem dawn a. Voter-te chanchin dah khah hnuah la khawm lehin, online portal-ah an chhu lut ang a. Chumi hmang chuan draft electoral roll buatsaih a ni ang.

Enumeration Form sem leh lak khawm chungchangah felfai zawka kalpui a nih theih nan polling station tina voter tam dan azirin hunbi tiam siam a ni a. Hemi mil hian BLO-te hma lak dan chu vil leh en zui turin ruahmanna siam a ni.

He hunah hian SIR kalpui meka media kal tlanga hma lakna tur ruahmanna (Media SOP) sawi ho ni bawkin, SIR kaihhnawih hma lakna hrang hrang chu media kal tlangin a zau thei ang bera puanzar dan kawng zawn ni se, tih a ni a. Inbiak pawhna leh internet ṭha lo avanga harsatna awm thei sut kian dan tur te, hlawhtling taka SIR kalpui a nih theih nana thil pawimawh hrang hrangte sawi ho a ni bawk.

SIR kalpui mek kah hian Electoral Roll hi a thar hlaka buatsaih a nih dawn avangin Enumeration Form theh lutte hming chauh Draft Roll-ah a chuang dawn a. Draft Roll-a hming chuang ve lote chuan a hranin July ni 5, 2026 aṭanga August ni 4, 2026 chhungin ERO/AERO hnenah document dangte nen Roll-a luh dilna an theh luh a, a hrana hearing neih leh a ngai dawn a. Final Electoral Roll hi September ni 6, 2026-ah tihchhuah tur a ni.

Lunglei District-a Special Intensive Revision chungchanga zawh duh nei tan Toll Free Number 1950-ah emaw, ERO Office leh District Level-a Help Desk-ah emaw zawh fiah theih a ni.

Lunglei District hi Assembly Constituency parukah ṭhen niin, tun dinhmunah voter 1,03,037 an awm mek a. Polling Station 180 awmin, BLO mi 180 leh BLO Supervisor mi 29 an awm mek a. Assembly Constituency paruk — 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui te hi ERO leh AERO pakhat zelin an enkawl a ni.