765/2026-2027  
Aizawl, the 29th May, 2026 : Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Post Matric Scheduled Tribe Scholarship Scheme hnuaia hamthatna dawngtu zirlaite chu Durbar Hall, Lok Bhavan-ah a kawm. He inkawmhona hi Janjatiya Garima Utsav 2026 hnuaia "Birsa Lives in New Bharat Week" kaltlanga buatsaih a ni.

Larsap General (Dr) Vijay Kumar Singh chuan Post Matric Tribal Scholarship Scheme chungchangah zirlai ten lang tlang taka an tawnhriat leh harsatna tawhte a hnena an thlen chu lawmawm a tih thu sawiin, scholarship chu sum leh paia inpuihna mai ni lo, mawhphurhna kengtel a nih thu a sawi a. Sawrkar laipuiin tribal-te hmasawn nan theihtawp a chhuah thu sawiin, zirlaite chu tribal scholarship leh scheme dangte midangte hrilh hriaa theh darhtu Ambassador nih tum turin a fuih a. Tribal-te zirna chawisan nan school tha tak tak Eklavya Model Residential School, Jawahar Navodaya Vidyalaya leh Kendriya Vidyalaya-te chhawr tangkai a tul thu a sawi bawk.

Larsap chuan tribal mihuaisen Bhagwan Birsa Munda chanchin entawntlak tak takte tarlangin, Mizote pawhin hetiang anga tribal mihuaisen lar tak tak Lalnu Ropuiliani, Pasaltha Khuangchera leh adangte kan neih thu a sawi a. Ram innghahna zirlaite chu Digital India hmalakna ngaipawimawha lehkha phek hman ti tlem turin a chah a. Scholarship chuan kentel a neih thu sawiin, lehkha zir taimak, entawntlak taka nun leh exam tura tha taka inpuahchahte, chhungkua, state leh ram dah pawimawhte bakah midang puih duhna putte a kentel thu a sawi bawk.

Zirlaite chuan Post Matric Scheduled Tribe Scholarship Scheme siamtu Sawrkar chungah lawmthu sawiin, abik takin chhungkaw harsa leh thingtlanga chengte tan a tangkai lehzual thu an sawi a. An tawnhriat leh harsatna neihte sawi chhuah theihna hun tha tak siam saktu Larsap chungah lawmthu an sawi bawk a. Scholarship chuan result tha nei tura mawhphurhna a pek mai bakah sawrkar scheme duante chu mipui hamthatna tur a ni tih an hriat chian lehzual thu an sawi a ni.

Larsap hnena zirlai ten harsatna an thlen zingah hian a hun taka scholarship a lut thin lo chuan admission fee, zirlaibu leina leh tul dangah harsatna a thlen thute, zirna senso sang zela scholarship pung ve se an duh thute, online application awlsam leh rang zawk bakah Aadhaar leh bank account thlunzawma harsatna tawhte an thlen a. Scholarship bik buaipuina tur help desk bank branch zawng zawnga dah an duh thute, tribal zirlai ST Scholarship dawng theite hmaih an awm loh nan awareness campaign nasa zawka neih tha an tih thute bakah, form submit laia senso awmte tih bo emaw, tih tlem nise an duh thute an thlen a ni.

He hunah hian Dr. C. Laldawngliana, Secretary, Mizoram Scholarship Board (MSB) chuan inlawmna thu a sawi a. Pu Joseph L. Hauhnar, Under Secretary, MSB hnen atangin Post Matric Scheduled Tribe Scholarship Scheme chungchang ngaihthlak a ni a. Programme zawh hnu hian Larsap thurawn angin zirlai ten lehkha phekah an ngaimawh zawngte ziakin an thlen a ni.