4194/2024-2025

Lunglei, 2025 Ramtuk thla ni 11: February ni 12, 2025 (Nilaini)-a Lunglei District chhunga village council (VC) 85 leh Lunglei Municipal Council (LMC) huam chhunga local council (LC) 24-a inthlanpui buatsaih tura inthlan buaipui tur polling party 162 te chuan vawiin khan Lunglei Bawrhsap pisa huam chhung aṭangin an duty-na tur hmun an pan.

Polling party kal chhuak turte hian polling station ang zela an chhuah hun tur dar bituk angin zing dar 6 aṭanga chawhnu dar 1 thlengin Despatch Centre pali - DC pisa, DRDO pisa, LAD pisa leh Treasury-a counter pasarih aṭangin inthlan buatsaihna tur hmanrua leh bungruate lam khawmin, an bungruate an endik fel vek hnuah an duty-na tur hmun panin an chhuak a. Polling party-ah hian inthlan huaihawttu tur Returning Officer (RO)-te, inthlan buaipuitu tur Presiding Officer (PRO), Assistant Presiding Officer (APRO) leh Polling Officer (PO)-te, venhimna hna thawk tur security-te leh lirthei khalhtute an tel a. Hemi rual hian Lunglei District chhung sector 23-a inthlan vil tur sector officer-te pawh an sector lam panin an chhuak ve nghal bawk a ni.

Lunglei District-a VC 88 leh LC 24 awmah VC pahnih (seat 3 ve ve awmna) - VC02058-Sailen leh VC02065-Sumasumi-ahte chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC 86 leh LC 24-ah, seat 486 (general seat 356 leh reserved seat 130) atan polling station 163 (VC 112 leh LC 51)-ah inthlan hi buatsaih a ni dawn a. VC 85 leh LC 24-ah chuan a tira ruahman sa angin February ni 12, 2025 (Nilaini) zing dar 7 leh tlai dar 4 inkarah vote thlak a ni dawn a. VC02030-Lalnutui-ah erawh chuan vanduaithlak takin VC candidate thi a awm avangin State Election Commission (SEC) chuan ruahmanna thar siamin, February ni 13, 2025 (Ningani) zing dar 7 leh tlai dar 4 inkarah vote thlak a ni thung dawn a. Lalnutui polling station-a inthlan buaipui turte chuan naktuk, February ni 12, 2025 zing dar 8-ah an duty-na tur hmun an pan ve thung dawn a ni.

Lunglei District-a VC 88 leh LC 24-a seat 492 (general seat 360 leh reserved seat 132) awmah inthlan chuhtu candidate mi 1,438 (general seat-ah 1,064 leh reserved seat-ah 374) an awm a. Bharatiya Janata Party (BJP) candidate 38; Indian National Congress (INC) candidate 341; Mizo National Front (MNF) candidate 431; Zoram People's Movement (ZPM) candidate 478 leh Independent candidate 150 an awm a ni.

VC 88-ah hian vote nei mi 51,731 (mipa 26,596 leh hmeichhia 25,135) awmin, LC 24-ah vote nei mi 41,206 (mipa 19,364 leh hmeichhia 21,842) an awm bawk a. District pum puiah vote nei mi 92,937 (mipa 45,960 leh hmeichhia 46,977) an awm a ni.

VC leh LC inthlanpui 2025-a official duty tur, postal ballot-a vote thlak dilte tana vote thlak theihna ruahmanah Lunglei District chhunga vote nei mi 847 aṭangin postal ballot vote thlak dilna dawn niin, mi 718-in vote an thlak a. Vote thlak ta lo mi 129 an awm a ni.

Lunglei District Election Officer & District Municipal Election Officer Pi Navneet Mann chuan February ni 12 leh ni 13, 2025-a Lunglei District-a VC leh LC inthlan buatsaih turah District mipui vote nei zawng zawngte vote thlak ṭheuh turin a sawm a ni.