784/2025-2026

Lunglei, 2025 Nikir thla ni 9: India ram puma furpui thlai chin hun (Kharif season) lo thleng tur atana inbuatsaih nana kut hna thawktute an khuaa kal chilh runpui, Viksit Krishi Sankalp Abhiyan (VKSA) kalpui mek chu vawiin khan a ni thum nan Lunglei District chhungah kalpui chhunzawm a ni a. Agriculture, Horticulture, AH & Veterinary, Krishi Vigyan Kendra (KVK), Soil, Sericulture leh Fisheries official-te chu team thumah insiamin khua/veng pariatah an feh chhuak a ni.

VKSA Team feh chhuakte hian Lungrang South, Lalnutui, Thingfal, Ṭawipui South, Ṭawipui North-II, Dawn, Lungsen leh Ralvawng te tlawhin, kut hna thawktu mi 1,165 (mipa 692 leh hmeichhia 473) te nen hun an hmang ho va. Thlai chin, ran vulh, sangha leh pangang khawi leh kut hna thawh kaihhnawiha hriat tur pawimawh hrang hrangte zirtirin, thlai chi ṭha leh tun lai thiamna hman ṭangkai dan te, thlai leh ran natna enkawl dan te, lei ṭha hman dan leh sawrkarin kut hna thawktute tana hamṭhatna a duan hrang hrangte an zirtir a. Zawhna leh chhanna leh sawi hona hun hlawk tak hman ho a ni bawk.

VKSA campaign hi India ram pumah May ni 29, 2025 khan kalpui ṭan niin, Lunglei District-ah chuan June ni 5 aṭang khan kalpui ṭan a ni a. Ni thum chhungin khaw 21-ah hun hman tawh niin, kut hna thawktu mi 2,913 (mipa 1,844 leh hmeichhia 1,069) an tel a ni.

Attachment

  • Loading attachment...