785/2025-2026

Dated Kolasib the 9th June, 2025 : Nimin chawhnu dar 2:00 khan Kolasib District tantlang National Highway 306 & 06 a Kawngpui thawmthat hna kal mekah Kolasib Deputy Commissioner Pu Robert C. Lalhmangaiha chuan National Highways and Infrastructure Development Corporation Limited (NHIDCL) hotute leh Mizoram Tipper Association, Kolasib District-te thukhawmna a neih pui a. He thutkhawmna ah hian National Highway thawmthat hna tha leh chak taka thawh a nih theih nan hmalak dan tur rel a ni.

Kolasib DC Pu Robert C. Lalhmangaiha chuan Kolasib District chu Mizoram hmar lama State luhka ber a nih avangin Mizoram State Life-Line pawimawh tak a nih thu a sawi a. NHIDCL hnuaia National Highway 306 & 06 siamthat hna thawk mektu Balaji Construction Company-te chu Mizoram mipuite mamawhna ngaipawimawha State luhka kawngpui tha tak siam turin an rilru leh ngaihtuahna seng turin a chah a. Fur khuain hna a tih thuan awp hma ngeia zo ngei turin a hrilh bakah, hmanraw hman ngaite pawh a tha leh tlo hmanga kawngpui tha leh daihrei tur siam turin a chah a ni.

He thutkhawmna ah hian NHIDCL atangin Pu BK Srivastava, General Manager, Kolasib NHIDCL chuan National Highway 306 & 06 kawngpui thawmthat hna kal mek a hmalakna te a tarlang a. Mizoram Tipper Association, Kolasib District hruaitute chuan he thutkhawmna ah hian National Highway a thatloh avanga lirthei neitute harsatna tawhte an thlen bawk a, lirthei chetsualna leh chhiatna tam tak pawh kawngpui tha lo hian a thlen thin thu sawiin, kawngpui tha tak neih a nih theih nan ngenna an siam bawk.

National Highway 306 & 06 hi kumin March ni 31, 2025 khan Black Topping zawh niin Balaji Construction Company-ten an lo thawk zo tawh a. Amaherawhchu, tun dinhmunah heng kawng siam zawh tawhte hi a chhe lai a awm leh tawh a. Heng kawngpui siamte hi Defect Liability Period in a huam avangin a siamtu Balaji Company-te hian a thawmthat hna an thawk leh mek a ni.

He thutkhawmna ah hian Mizoram Public Works Department (PWD) te'n kawngpui chhiat chhannate zirchianna nei turin ngen nise tih a ni a. Kawngpui chhiate hi chak tak a thawhthat a nih thuai theih nan hma lak dan tur rel a ni bawk.