1263/2026-2027

Lunglei, 2026 Vawkhniahzawn thla ni 2: India ram puma zenghri dan beihpui thlak (pulse polio immunisation) tura National Immunisation Day (NID) ruahman chu nimin khan Lunglei District-ah pawh hman niin, District chhunga khaw 154-a vaccination booth 190-ah leh transit camp 3-ah te naupang kum 5 hnuai lam 9,356 hnenah zenghri danna kaa thlawr chi (oral polio vaccine) pek a ni.

Tlabung Sub-District Hospital-a hun buatsaihah Tlabung Sub-Divisional Officer (Civil) Pu Moses Lalfakawma Tlau chuan Lunglei District-a SNID kalpui tur hi a hawng a. Naupangte zenghri laka an him theih nana ni thum chhunga zenghri danna pek runpui kalpui tur chu hlawhtling taka kalpui a nih theih nan thawktute chu theih tawp chhuah tura chahin, District chhunga naupang kum 5 hnuai lamte'n hri danna an lak kim vek theih nan nu leh pate leh mipuite'n thawktute ṭha taka lo thawhpui a, lo ṭawiawm turin a ngen bawk.

He hun hi Tlabung Sub-Divisional Medical Officer Dr Benjamin Vanlalliana chuan a kaihruai a. Lunglei District Immunisation Officer Dr Christina Zonunmawii chuan NID hman chhan leh a pawimawhna bakah, Lunglei District-a NID kalpui dan tur ruahmanna te a sawi.

He hunah hian Lunglei District Programme Manager (AYUSH) Dr Lalchamliana bakah, hriselna lama thawktute, khawtlang hruaitu leh tlawmngai pawl ai awhte, vaccine la tur naupangte leh nu leh pate an tel a. Khuallian leh official dangte chuan naupang kum 5 hnuai lam kal khawmte chu zenghri danna kaa thlawr chi (oral polio vaccine) far hnih zel an pe nghal bawk.

Lunglei District-a NID kalpuiah hian zenghri danna pek tur naupang 10,595 tinzawn (target) an ni a. Nimin khan Lunglei District-a khaw 154-a hri danna pekna tur hmun (vaccination booth) 190 leh transit point 3 buatsaihah hri danna pek runpui hi buatsaih niin, hriat theih chinah naupang 9,356 chu hri danna hi pek an ni a; hei hi District target 10,595 aṭangin 88.31% a ni a. Hemia pek bakte chu vawiin leh naktuk (July ni 2 leh ni 3) hian hriselna lama thawktu – health & wellness officer, health worker, ASHA leh anganwadi worker-te'n in tina kal chilha zawng chhuakin, hri danna hi an pek chhunzawm ang.

India rama zenghri vei hmuh chhuah hnuhnun ber chu January ni 13, 2011 kha niin, March ni 27, 2014 khan World Health Organisation (WHO) chuan India chu zenghri awm lohna ram (polio free)-ah a puang tawh a. Hetih lai hian ram ṭhenawmah zenghri hmuh a la nih reng avangin zenghri danna pek hi kalpui chhunzawm zel a ni.