1264/2026-2027

Aizawl the 2nd July, 2026: Tukin zing dar 8:30 khan Dr Vanlalthlana, Education Minister leh Pu B. Lalchhanzova, Supply Minister chuan Aizawl East II Constituency chhunga School ṭhenkhat an tlawh a. School mamawh hrang hrangte a hmunah en hoin hmalak dan tur te an sawi ho. Pi Christina Roluahpuii Sailo, Aizawl Municipal Corporation Cash & Accounts Executive Corporator pawhin Minister-te hi a tawiawm a ni.

Chite Upper Primary School leh Govt Primary School, Chite an tlawhnaah School Management Committee leh khawtlang hruaituten Minister-te leh AMC Executive Corporator te hnenah hian an mamawhte an lo thlen a. School ram a hmunah en nghal niin, School-in anmahni pual building an neih theih nana hmalak dan tur te sawi ho a ni. Tunah hian Chite UPS leh Govt PS, Chite te hian Mizoram State Sports Council hnuaia Chite Mini Sports Complex Building chu Classroom atan an hmang mek a ni.

Education Minister Dr. Vanlalthlana chuan thu sawiin, kan ram zirnain hma a sawn zel theih nan, Public-Private Partnership (PPP) mode-a sawrkar leh kohhran thawh dunna hmanga sikul ṭhenkhat enkawl tum a nih thu leh ruahmanna kalpui mek a nih thu a sawi.

Supply Minister Pu B. Lalchhanzova pawhin a bial chhunga school awm te chu an hamthatna tura hmalak a nih chhoh dan te sawiin, kawng hrang hranga hma chhawp fel tak neiin hmasawnna tur ruahmanna siam chhoh zel a nih thu a sawi bawk.

Chite UPS leh Govt PS Chite bakah hian Govt. Primary School-II, Armed Veng South; Govt Primary School-I, Armed Veng; leh Govt. Armed Veng Middle School-te an tlawh bawk a ni.

He hunah hian Pi Angela Zothanpuii, School Education Director; Pu C. Lalthanzira, State Project Director, Samagra Shiksha Mizoram; Pu Andrew Lalrintluanga, Dy.SPD, Samagra Shiksha Mizoram; Dr Lalhruaitluangi, SDEO, Aizawl East leh Department official ten Minister leh AMC Executive Corporator te hi an ṭawiawm a ni.