1265/2026-2027

Dated Champhai, 2nd July 2026: Vawiin chawhma dar 10 khan District Hospital, Champhai-a Doctors Lounge-ah CT Scan khawl thar hawnna hun neih a ni a, Er. H. Ginzalala MLA Champhai North leh Advisor to CM (Technical) ni bawk chuan khuallian niin a hawng a ni.

Khuallian Er. H. Ginzalala chuan he hmasawnna thar hi Champhai mipui chauh ni lo, a chhehvel bial hrang hrang mipuite tana khawl changkang tak mipuite tana chhawpchhuah a ni ta hi lawmawm a tih thu a sawi bawk. CT Scan khawl bun a nih theihna tura tha thawh zawng zawngte an hriat reng thu a sawi a, sawrkar kal tawhte leh bialtu MLA lo ni tawhte hnathawh an chhunzawma hman theiha peihfel a ni ta chu district tana hmasawnna nasa tak a ni, a ti. Hrisel tha taka nun kan hman zel theih nan kan ei leh inah fimkhur a ngai tih a sawi a, ei leh in bakah nitin nun dan thlenga thlak danglam a hun tawh, a ti a, taksa in sawizawi hi thangthar zawk te'n kan chin tan a pawimawh tawh tih a sawi a, dam loh hunah chauh Damdawi in pan lo tur leh dam that laia kan hriselna te endik fo zawk a that thu a sawi a, chu chuan natna khirh zawk kan neihna turah min veng thei tih a sawi.

Khuallian chuan Sawrkarin District Headquarters an ngaih pawimawh thu leh Champhai District pawhin sawrkar duhsakna a dawng nasa hle tih sawiin, thawktu indaih lohna pawh a theih ang anga hnawhkhat tura hma an la mek a ni tih a sawi a. Champhai khawpui chhung cheina atana sum cheng nuai 215 ruahman a ni tih a sawi a, zirna kawngah pawisa tam zawk chu a kal tih sawiim, zirnain tun aia hma a sawn theihna turin ruahhmanna siam mek a ni tih a sawi a ni.

He hun hi Dr. Zatluanga, Medical Superintendent, District Hospital Champhai chuan kaihruaiin lawmna thu leh inhmelhriattirna a nei a. Champhai leh a chhehvel mipuite tana he khawl pawimawh tak mai bun fel a ni ta hi a lawmawm a tih thu sawiin, damlo ten phai leh Aizawl thleng kher loa he hna an thawk thei tawh tur hi hmasawnna nasa tak a nih thu a tarlang.

He hunah hian Dr Lalnuntluanga, In-charge Radiodiagnosis department leh Dr PC Lalawmpuia, Senior Specialist ten thu sawiin, Dr Lalnuntluanga Ralte, Eye Surgeon-in lawmthu sawiin hun a khar a ni.

Hawnna inkhawm tluang taka hman a nih hnu hian khawl thar hi enfiah zui a ni a. He hunah hian Champhai District-a tlawmngai pawl hrang hrang aiawhte, sorkar official-te leh damdawi in thawktute an tel tha hle a ni.