No.6311/2020-2021

Police duty laia nunna chan tate hriatrengna leh zahna lantirna hun Police Commemoration Day chu India ram hmun dangte rualin vawiin khan Lunglei District-ah pawh hman a ni.

Police Commemoration Day pual hian tukin zing dar 7:30 khan 2nd Battalion MAP hmunpui, Luangmualah DIG Southern Range Pu Rajneesh Gupta, IPS hovin hun hman a ni. 21 October, 1959 a India Police ten Ladakh hmuna China sipai an lambunna hmuna Police huaisen tak tak 10 lai maiin nunna hlu tak an chan phah avanga he ni hi ram tana nun petute hriatrengna ‘Commemoration Day’ atan India sawrkar chuan a puang a, kum tin hman thin a nih thu a sawi a. India ram State hrang hrangah ni 1.9.2019 atanga ni 31.8.2020 chhungin Police mi 265 lai thi an awm thu sawiin vanneihthlak takin Mizoram Police zingah hemi hun chhunga duty laia thi an awm loh thu a sawi bawk. DIG Southern Range Pu Rajneesh Gupta, IPS chuan nunna chan mi 265 te hming hi chhiar chhuakin Martyr’s Memorial-ah an puala parthi hlanna hun hman a ni.

Vawiin vek khan SP Office Conference Hall Lungleiah Police Commemoration Day hi hman a ni.

He hun hi Jacob Hlychho Addl.SP Lunglei in a kaihruaia, he huna khuallian DIG Southern Range Rajneesh Gupta IPS chuan thu sawiin, ram tana nunna hlu tak hlantu Police zawng zawngte chu hriat reng an nih dawn thu leh ram tana an inpekna chu midangte tan chona lian tak a ni tiin, heng martar te hre reng chung hian tuna Police hna thawk mekte pawhin rinawm leh huaisen taka mawhphurhna kan hlen a tul a ni a ti.

He huna thusawitu dang Lunglei SP Pu Stephen Lalrinawma chuan nikum September ni 1 atanga kumin August ni 31 thlengin India ramah Police ram tana Martar mi 265 an awm thu leh Mizoram ah erawh vanneihthlak taka Police Martar an awm loh thu a sawi a, heng bakah hian Lunglei DEF hnuaia hmalakna hrang hrang SP hian tarlangin kumin ah Lunglei DEF hnuaiah ILP thubuai avangin mi 10 man an nih thu te, Traffic lama hmalakna ah dan zawmlo mi 1,114 hnen atangin cheng 2,9,8000/- sum hmuh a nih bakah Covid-19 laka invenna kawnga Police enforcement ten dan bawhchhia te hnen atanga sum an chawi tir tawh chu cheng 6,5,2000/- a nih thu a tarlang bawk.

Vawiina he hun hmanna ah hian Kum 2000, August ni 14 a, Bindhiasora bula Bru National Liberation Front ten an kahhlum tak Constable C.Thangduna sunna hun hman niin a chanchin tlangpui nghaihthlak a ni bawk. Heng bakah hian Lunglei DEF hnuaia Police fate zirna lama titha zual mi 11 HSLC chin chunglam te hnenah lawmpuina Citation hlan an ni a, he hun hmanna ah hian SP Office Lungleia thawktute bakah Lunglei khawpui chhunga Police Pension tawhte pawh an tel a ni.