4222/2024-2025

Lunglei, 2025 Ramtuk thla ni 13:  Nimin, February ni 12, 2025 (Nilaini) khan Lunglei District chhunga village council (VC) 85 leh Lunglei Municipal Council (LMC) huam chhunga local council (LC) 24-ah tluang takin inthlan vote thlak zawh a ni a. A pum puia vote awm zawng zawng 92,669 aṭangin vote 70,286 (75.85%) a tla.

Lunglei District-a VC 88 leh LC 24 awmah VC pahnih (seat 3 ve ve awmna) - VC02058-Sailen leh VC02065-Sumasumi-ahte chuan inthlan chuhtu awm chhunte chuh buaitu an awm loh avangin vote thlak ngai lova tlinga puan an ni a. VC02030-Lalnutui-ah vanduaithlak taka candidate thi a awm avangin February ni 13, 2025 (Ningani)-a vote thlak turin ruahman a ni bawk a. Nimin khan VC 85 leh LC 24-ah, seat 483 (general seat 354 leh reserved seat 129) atan polling station 162 (VC 111 leh LC 51)-ah inthlan hi buatsaih niin, vawiinah VC 1-ah, seat 3 (general seat 2 leh reserved seat 1) atan inthlan buatsaih a ni ve leh ang.

Lunglei District-a VC 88 leh LC 24-ah hian a duh apiangin an chuh theih general seat 360 leh hmeichhe tana hauh reserved seat 132, a zavaiin seat 492 a awm a. Inthlan chuhtu candidate zawng zawng hi mi 1,438 (general seat-ah 1,064 leh reserved seat-ah 374) niin, Bharatiya Janata Party (BJP) candidate 38; Indian National Congress (INC) candidate 341; Mizo National Front (MNF) candidate 431; Zoram People's Movement (ZPM) candidate 478 leh Independent candidate 150 an awm a ni.

Nimina inthlan vote thlakna VC 85 leh LC 24-ah hian vote nei mi 92,669 (mipa 45,767 leh hmeichhia 46,902) awmin, vote 69,568 (mipa 34,275 leh hmeichhia 35,293) a tla a. Hei hi vote awm zawng zawng aṭangin 75.07% a ni a. Inthlan nia vote tla bakah hian inthlan duty turte vote lo thlak lawk, PED (persons on election duty) vote 718 awmin, a vaia belh khawmin vote 70,286 (75.85%) a tla a ni.

VC bika voter 51,458 (mipa 26,404 leh hmeichhia 25,054) awmah inthlan niah vote 41,222 (mipa 21,176 leh hmeichhia 20,046) tlain, inthlan nia vote tla hi 80.11% a ni a. PED (persons on election duty) vote 147 awmin, a vaia belh khawmin vote 41,369 (80.39%) a tla a ni. VC02064-Silkur-ah vote tla ṭha berin, vote awm zawng zawng 604 aṭangin vote 579 (95.86%) a tla a. VC02085-Zawlpui-ah vote tla chhe berin, vote 890 aṭangin vote 510 (57.30%) a tla a ni.

LC bika voter 41,211 (mipa 19,363 leh hmeichhia 21,848) awmah inthlan niah vote 28,346 (mipa 13,099 leh hmeichhia 15,247) tlain, inthlan nia vote tla hi 68.78% a ni a. PED (persons on election duty) vote 571 awmin, a vaia belh khawmin vote 28,917 (70.17%) a tla a ni. XI/1-Lungpuizawl LC-ah vote tla ṭha berin, vote awm zawng zawng 485 aṭangin vote 409 (84.33%) a tla a. IX/1-Lunglawn LC-ah vote tla chhe berin, vote 2,543 aṭangin vote 1,536 (60.40%) a tla a ni.

VC leh LC Inthlanpuia vote tlate hi vote thlak zawh fel hnu zan lamah, zan dar 7 aṭangin returning officer (RO)-te kaihhruaiin constituency tina counting hall ṭheuhvah chhiar nghal a ni a. Vote chhiar zawh hnuah ballot paper leh lehkha pawimawh leh bungraw dangte chu Lunglei DC office lam panpui leh nghal a ni.