Vawiin chawhma dar 11:00 khan Lunglei District Airport Survey Committee chuan Lunglei DC hovin Circuit House Conference Hall, Lunglei-ah Lunglei huamchhunga Airport puitling siam a nih theih dan tur leh ruahmanna hrang hrang chhawpchhuahte thlir hovin meeting pawimawh tak an nei.

He meeting hi Lunglei Bawrhsap Pu V. Sapchhunga'n kaihruaiin Wg. Cdr. Lalzawma; Pu S.Laldingliana Parliamentary Secretary; Pu Joseph Lalhimpuia Vice Chairman, High Power Committee Lunglei bakah Airport Survey Committee member-te an tel kim hle a ni. Wg. Commander Lalzawma chuan kum 1983 kum atanga Lengpui Airport siam tumna neih a nih tirh atanga Commission a nih hnu atang khan Lunglei district huamchhungah Airport neih a nih theihna tura hma lo lak tawhna hrang hrangte tarlangin Airport siamna tura Criteria pawimawh tak tak te a sawifiah bawk a. Mizoramah chuan thil dang zawng aiin Airport siamna kawngah hian hmunhma kan neih that tawk loh avanga buaina pawh tawk thin kan nih thu te sawiin amah ngei pawhin airport hmun tur atana Denlung, Saitluk leh Thlisam ram te a lo luh chilh tawh thu te, mahse, airport puitling atana hman theih an nih loh avanga loh theih lohva chawlhsan a nih dan sawiin tuna Kawmzawl airport DPR erawh chu Airpor Authority of India in objection siama an reject thu leh tunah hian revision siam a theh luh nawn anih dawn thute a sawi bawk. PHE Pipeline kal vanga harsatn awm pawh sutkian dan zawn mek a nih thu leh pipeline sawnna senso pawh DPR a beh tir mai tha a a hriat thu a sawi a. Pu Zawma hian International Airport tak tak ang kan pha ngang lo a nih pawhin Airport te nau tal chu kan sual chhuak ngei tur a ni a ti.

He huna thusawitu Pu S.Laldingliana pawhin Lunglei district in Airport a mamawhna hi a sang em em a. Indo Bangla Border Trade leh Burma nena insumdawntawnna kalpui lai mek te han thlir phei chuan tihmakmawha a ngaih thu sawiin hetiang a nih lai hian Politics inchirtheh nana hmanga inbeih phah nana hmang duhtu an lo awm leh thin chu pawi a tih thu te, Sawrkar in mipui bum a tumna ang zawnga thu lo thehdarh tawk an awm leh thin chu zahthlak a tih thu a sawi a. Amah ngei pawhin Airport neih theihna tura Saitluk, Thlisam, Kawmzawl leh hmun dangah pawh a lo luh tawh thu te tarlangin, "Tuna Airport siam tumna leh duhna hi Chhimbial Chhanhimna tur a ni" a ti bawk. Pu Joseph Lalhimpuia, Vice Chairman, HPC pawhin thusawiin airport changtlung tak neih a chak thu leh sawrkar pawhin he thil hi tih tak taka a bawhzui thu te, politics ang zawnga thil kalpui chu tha a tih loh dante a tarlang bawk a ni.

Airport Survey Committee te chuan ngaihdan hrang hrangte an thawhkhawm hnu ah heng hmun : Khawthir Tlang, Vuakmual ram leh Saihum tlang te hi a rang lama mithiamte nena enfiah ni se tiin thutlukna an siam a ni.

Hemi hnu hian Airforce lamin Zopui Tlang, Airbase a hmanga Radar dah nana Mizoram sawrkar hnena ram lei an dil chungchang thu te chu ngaihdan hrang hrang thawhkhawma sawiho a ni bawk.