Nimin tlai dar 4:30 khan Chief Minister Pu Lal Thanhawla hovin a office ah NLUP hnuaia Agarbati Stick siamtute dinhmun thlir ho a ni.

Tunah hian Agarbati Stick siamtute hnenah an trade thlanah harsatna awm thei hrang hrangte zawh kual mek a ni a, a tlangpui thuin mau hmuh harsat vang leh a manto lutuk vangin he trade thlangtute hian harsatna an tawk tam ber niin a lang.

Aizawl khawpui chhung cluster thenkhat leh Lunglei khawpui chhunga Agarbati Stick siam thlangtute harsatna enpui a, report tun thla chhunga thehlut turin Aizawl District leh Lunglei District DC te leh District Industry hotute chu ruat an ni. Hemi hnuah hian report awm dan a zirin hmathar lak nise tih kalkhawm chuan a rel.

‘Kut Hnathawktute Ni’ hman nise tih rawtna pawh meeting hian an ngaihtuah a, a hun leh hman dan tur ngaihtuahtu committee din an remti bawk.

Nimin tlai meeting ah hian NLUP hmalakna hrang hrang leh hlawhtlinna awm mekte thlir ho a ni a, Chief Minister bakah NLUP Nodal Minister Pu H. Liansailova; Lok Sabha MP Pu C.L. Ruala; Industry Department; Forest Department leh NLUP Implementing Board hotute an tel a ni.