714/2022-2023

India ramin zalenna a hmuh champha kum 75-na lawmna Azadi Ka Amrit Mahotsav kalpui mek zelah a lawmna peng pakhat atana India ram puma “Mi Retheite Chhawmdawlna Inkhawmpui-Garib Kalyan Sammelan” buatsaih Prime Minister hova vawiina hman chu Convention Centre, Lunglei atangin Video Conference kaltlangin Lunglei HPC Vice Chairman Pu Lawmawma Tochhawng hovin zawm a ni.

Sawrkar laipuia Ministry hrang hrang 9 hnuaia mipui hamṭhatna tur ruahmanna (scheme/programme) hrang hrang 16-a hamṭhatna dawngtu (benficiary)-te nena inbiangbiakna atan te, he’ng scheme hrang hrangte’n khua leh tuite tana khawsak awlsamna a thlen dan hriat fiahna mai bakah, ṭangkai lehzual zawka mipuiin an chhawr theih dan tur rawtna awm theite hriatna atan te he Inkhawmpui hi buatsaih a ni a. Kum 2047-a India ramin zalenna a hmuh kum 100-na atana khua leh tuite hmathlir leh beiseite hriat theihna atan tih a ni bawk. 

Lunglei District-ah chuan Prime Minister-in tanpuina dawngtute kawmna a neih hma in, zing dar 9:45 ah Convention Centre, Lungleiah inkhawm tawi buatsaih a ni a. He inkhawm tawiah hian UD&PA Department leh Women & Child Development atangin an scheme kalpuite sawifiahna hun ngaihthlak a ni a. Scheme hrang hrang atanga tanpuina dawngtute nen inkawmna hun neih a ni. Lunglei District mi Freedom Fighter Pu Darthawma Renthlei (L) fapa Pu R. Lalbiaktluanga chuan a pa chanchin tlangpui sawina hun a hmang bawk a ni.

Pu  Lawmawma Tochhawng, HPC Vice Chairman chuan Lunglei District-ah sawrkar laipui scheme hrang hrangte a line Department ten tha taka an kalpui chu a lawmawm takzet a ni tiin  sawrkar scheme hrang hrang hlawhtlinna chu beneficiary-te leh line department-te thawhhona rah a ni, a ti a. “Mi Retheite Chhawmdawlna Inkhawmpui-Garib Kalyan Sammelan” chu Lunglei District tan pawh hmasawnna rahbi thar thlentu anih ngei a beisei thu a sawi a ni.

Inkhawm tawi hi Pu V.Lalruatliana, Additional DC in a kaihruai a, Pu M Misael, PD, DRDA in lawmthu sawiin hun a khar a ni. Inkhawmah hian District officials, media, khawtlang hruaitute leh tlawmngai pawl aiawhte te bakah District chhunga scheme hrang hrang thlan chhuah atanga tanpuina dawngtute mi 116 an tel a ni.

Inkhawm tawi hi a tawp hnuah chawhma dar 11:00 ah Shimla, Himachal Pradesh atanga Prime Minister-in mipuite hnena a thuchah leh scheme thlan chhuahte atanga tanpuina dawngtu India ram hmun hrang hranga awmte a kawmna chu video-conferencing hmangin an chhim zui nghal a ni.

Vawiina hun hmanah hian he'ng a hnuaia scheme/programme hrang hrangte hi thlur bing a ni:

1) Pradhan Mantri Awaas Yojana (Grameen & Urban)

2) Pradhan Mantri Kisan Samman Nidhi

3) Pradhan Mantri Ujjwala Yojana

4) POSHAN Abhiyan

5) Pradhan Mantri Matru Vandana Yojana

6) Swachh Bharat Mission (Grameen & Urban)

7) Jal Jeevan Mission & AMRUT

8) Pradhan Mantri SVANidhi Scheme

9) One Nation One Ration Card

10) Pradhan Mantri Garib Kalyan Anna Yojana

11) Ayushman Bharat PM Jan Arogya Yojana

12) Ayushman Bharat Health and Wellness Centre

13) Pradhan Mantri MUDRA Yojana