Vawiin khan Lunglei DC Conference Hall-ah Additional DC Pu David Liansanglura Pachuau kaihhruaiin Lunglei District Consultative Committee (DCC)/ District Level Review Committee (DLRC)/District Level Security Committee (DLSC) an thukhawm.

Meeting ah hian Line Department hotute, RBI, NABARD, BSNL, MHIP leh Lunglei District bank hrang hrang manager te kalkhawmin Quarter ending March 2019 chhunga Bank hrang hrang te hmalakna an thlir ho. Pu David Liansanglura Pachuau chuan Lunglei District Annual Credit Plan 2019-2020 a tlangzarh nghal a ni.

He meeting a pharh, March 2019 quarter tawp a Lunglei District chhunga bank hrang hrang te hmalakna tlangpui chu hetiang hi a ni. Lunglei District pumpui ah Deposit Rs. 67193.66 lakhs niin loan pek chhuah zat chu Rs.37226.96 lakhs niin Credit Deposit Ratio (CD Ratio – Bank in Deposit a dawn atanga loan a pekchhuah zat) chu 55.40% a nih thu tarlan a ni. Priority Sector Advance (Agriculture, Micro Enterprise, Loan to weaker section) chu 63.65% niin hei hi a tha thawkhat viau a ni. March 2019 quarter chhungin mi 155 hnenah Agriculture loan Rs. 253.95 lakhs total pek chhuah tawh a ni. Tin he quarter chhung vek hian sumdawng hrang hrang - Micro, Small and Medium Enterprises (Manufacturing leh Services) mi 212 te hnenah loan Rs. 333.67 lakhs pek chhuah an ni. Committee chuan Line Department leh Bank-te thawhhona tha tak nei chhunzawm zel se tiin Banking chungchang mipuite zirtirna Financial Literacy Campiang te pawh tun aia uar zawka neh ni se tih a rel.

Bank Security chungchang ngaituah hona ah Bank hrang hrang ten Bank Security an neih bakah CCTV, Fire Extinguisher, Alarm System leh Police patrol log book te dahin an enkawl that thu tarlan a ni a. Lunglei Police te nen hemi kawnga thawhhona tha tak an neih thu tarlan a ni. Bank manager-te tarlan danin ATM rawk tum an awm fo avangin tlai khaw thim hnu ah loh theih lohna avangin ATM te an khar mai thin thu an sawi. Account hralh emaw hriat ngailoh lo hman tir mai te an awm thin tih sawiin hemi kawngah mipuite fimkhur zawk tura an duh thu an tarlang. Sawrkar scheme hrang hrang Stand Up India, Housing for All, PM Social Security Scheme, NMUDRA Loan hnuaia bank hrang hrang hmalaknate sawiho a ni bawk.