4709/2024-2025

Lunglei, 2025 Vau thla ni 19: Vawiin khan Lunglei District Bawrhsap Pi Navneet Mann chuan National Highway 54A leh 302 kawngpui laih zauh leh siam ṭhat hna thawh meka Hrangchalkawn leh Theiriat huam chhunga hma lakna hrang hrang chu a hmunah kal chilhin a enfiah a. Lunglei Additional Deputy Commissioner & CALA Pi Rochuangkimi Khenglawt, Settlement Officer Pu Beitlotha Nohro leh DIPRO Pu C. Lalhruaitluanga te'n an ṭawiawm.


Bawrhsap hi NH-54A leh NH-302 (Lunglei - Tlabung) kawng siam mek enkawltu NHIDCL (National Highways & Infrastructure Development Corporation Limited) leh contractor BRNIPL (BRN Infrastructure Private Limited) te'n an lo dawngsawng a. Hma lakna hrang hrang te, mipuiin harsatna an tawh leh hna thawktute'n harsatna an tawh te en hovin, hma lak zel dan tur leh harsatna hrang hrang chin fel dan tur an sawi ho a ni.

Vawiina kawng siam hna thawh mek ennaah hian kawng atana ram lak, ROW (right of way) chin leh road reserve chin huam chhung neka in sak ṭhenkhatte enfiah niin, ROW chin an pelhna te ṭhiat tur leh siam ṭha tura hrilh an ni a. Kawng laih hna kal mek avanga mipuiin DC office-a harsatna an thlente pawh a hmunah enfiah niin, an harsatnate sawipui an ni bawk.

Bawrhsap chuan contractor-te chu mipuiin kawng khu lutuk vanga harsatna an tawh ṭhin chin fel a nih theih nan ni tin tuia kawng phuh huh ṭhin tur leh chenna in awmna lai bawrah phei chuan a zing thei ang bera tui phuh ṭhin tur te, fur hma ngeiin a theih anga tam GSB/WMM/DBM te phah hman leh luan hman tum tur te'n a hrilh a. Polytechnic hnuai kawng, lei min hlauhthawnawmna hmun chu furah a min loh nan retaining wall siam nghal thuai turin contractor-te chu hrilh an ni a. Kawng laihna leivung paihna hmun (muck disposal) tur ruahmanna thlir ho ni bawkin, leivung dawlna tur gabion structure a rang lama siam tur leh a paihna hmun atana ruahmanah chauh leivung paih turin contractor-te chu hrilh an ni bawk a. District thuneitute'n an ngaih pawimawh lai an sawite chu contractor-te chuan an bawh zui nghal tur thu an sawi a. A hma lamin hma lak dan thlir hona, review meeting pawh buatsaih tum a ni.

Attachment

  • Loading attachment...