4708/2024-2025

Kolasib Dated, the 19th March, 2025: Vawiin khan Kolasib DC Conference Hall-ah Kolasib khawpui huam chhunga lirthei tlan dan chungchangah 'District Traffic Management Committee' thutkhawmna neih a ni a. Pu Robert C. Lalhmangaiha, Deputy Commissioner leh District Traffic Management Committee Chairman nibawk chuan he hun hi a kaihruai a ni.

Pu Robert C. Lalhmangaiha, chuan he huna kalkhawmte chu khawtlang mipuite himna ngaihtuahtu an nih thu a sawi a. Kolasib khawpui paltlangtu National Highway Motor kawngpui pawh siamthat mek anih thu leh Sawrkar Official lam pawh in an vilpui reng thu a tarlang a. Lirthei hmanga eizawngtute leh Motor neitute pawhin kawngpui a that tawh avangin mipui himna ngaihtuah chunga lirthei khalh chu a pawimawh takzet a ni tiin, Traffic Management chungchangah rawtna tha an neihte chu engtik lai pawha dawnsawn an inhuam reng thu a sawi.

He hunah hian Kolasib Senior Superintendent of Police (SP) Pu David H. Lalthangliana chuan Kolasib khawpui huam chhunga Traffic Movement leh Parking Area chungchanga inkaihhruaina awm tawh sa leh dan ding laite Report a pe a. Kolasib District chhunga lirthei hrang hrang luh leh chhuah dan bakah lirthei tlan tam bikna hmunte leh vantlang tana him tawk lo a an ngaihte tarlanna hun a hmang bawk. Mipui leh lirthei lo pung zelah Traffic Movement chu zirchian reng a nih thu Kolasib SP chuan a sawi a ni.

Pu Benjamin Lalhmingsanga, District Transport Officer (DTO) leh District Traffic Sub-Committee Secretary ni bawk chuan 'District Traffic Management Committee' hmasa a Traffic Sub-Committee hmalakna Report pein hmachhawp dangte bawhzuih dan tur rawtna chipchhiar takin he hunah hian a pe bawk.

Kolasib District Traffic Management Committee thutkhawmna ah hian Kolasib Diakkawn Square leh a chheh vel  huamchhunga Taxi Stand leh Auto-Rickshaw Stand hrang hrang sawnkual dan tur leh vantlang mipui tana Motor Parking-na hmun tam zawk leh remchang zawk Traffic Sub-Committee-in rawtna an siam chu ngaithlak a ni a. Rawtna an rawn siam ang hian he Committee hian April ni 1, 2025 atangin hman tan phawt nise a ti a. Mipui vantlang himna tura rawtna tha zawk leh felfai zawk a awm chuan Traffic Sub-Committee chuan District Traffic Management Committee-ah thlen leh nise ti a rel a ni a. Kolasib khawpui chhung kawngpui hmun thenkhat lirthei khalhtute leh mipui himna atan Road Sign leh ‘Convex Mirror’ tar dan tur sawiho a ni bawk.