4707/2024-2025

Saitual, the 19th March, 2025: Vawiin khan Mizoram Cooperative Apex Bank Keifang Branch building chu Pu Lalnunsanga, Chairman MCAB-in a hawng a, a hawnna hun hi VFDC Hall, Keifangah neih a ni. 

He hunah hian MCAB Chairman Pu Lalnunsanga chuan kalkhawmte hnenah lawmthu a sawi a, he hun thleng tur hian hun leh tha te bakah ngaihtuahna te an seng nasa hle a ni, a ti a, heti ang hun an thleng thei chu lawmawm a tih thu a sawi. MCAB Chairman chuan Apex Bank chuan Mizoramah Branch 30 an nei tawh tih a sawi a, Branch thar pasarih- Chawlhmun, Vairengte, W. Phaileng, Darlawn, Falkawn, Khualleng leh Chawngte-ah te hawng turin hma lak mek a ni, a ti. 

MCAB chairman chuan Apex Bank chuan hmachhawp tam tak an nei tih a sawi a, hnathawktu indaih lo thin hle mahse theih tawp an chhuah zel a ni, a ti a, hnathawk te pawh lak belh an mamawh dawn a ni tih a sawi. Pu Lalnunsanga chuan tualchhung mite chu Apex Bank-a thawk tura exam pe turin a fuih a, hei hian khaw chhunga hna thawhhona tha tak a neih theih phah a beisei thu a sawi bawk. Mipui tana zau leh zuala rawng an bawl theih nan leh sawrkar te nena tha taka an indawr theih nan theih tawp chhuah zel an tum thu MCAB Chairman chuan a sawi bawk a ni. 

Vawiin Keifang building hawnna hun hi Pu H. Lalhmangaihzuala, Manager, Keifang Branch-in a kai hruai a, Rev. David Lalrinmawia Sailo, Keifang Bial Pastor chuan hunserh a hmang a. Pu H. Lalhmangaihzuala, Keifang Branch hnen atang Building report ngaihthlak a ni a, Pu C Lalnunsanga, Chairman MCAB Ltd, Pu C. Lalchawimawia, Chairman MCSP, Pu Lalbiakthanga, Chairman, Joint VC, Keifang leh Pu Lalrosiama, Chairman, SDCU te chuan thu sawiin, Pu C. Lalhmunsiama chuan lawmthu sawinain he hun hu khar a ni. 

Apex Bank hi Keifang VC house-ah ni 21.07.2020 atang bul tan niin kum 5 hnuah mahni pual building sain ni 19.03.2025 hian an luah lut fel a. Building thar sakna hmun hi Keifang khawtlangin an luah duh chhung atan Apex Bank hi hman a phalsak a ni. Buidling hi chhawng li niin Bank hall, Manager leh Staff Quarters leh SDCU office a awm a, Building sak nan hian Rs. 235.42 lakhs sen a ni. 

Apex Bank hian Building an sak tharah hian Saitual District Cooperative Union tan Office tur an sak sak nghal a, vawiin vek hian Pu C. Lalchawimawia, Chairman MCSP in a hawng nghal a ni.

Keifang leh a chhehvel Saitual District chhunga  mipui ten bank hi an thlawp tha hle a, tunah hian Deposit Vaibelchhia 22.02 neiin Loan Vaibelchhia 10.17 an  pekchhuak a, an CD Ratio hi 46.18% a ni mek a ni. 

Mizoram Cooperative Apex Bank hian tun dinhmunah Branch 30 leh ATM 38 nei mekin, Deposit Vaibelchhia 1615.5 neiin Loan Vaibelchhia 1212.14 a pechhuak a. Sum dawn atanga loan pekchhuah tehfung (CD Ratio) 75.03% a nei a ni.