4706/2024-2025

Champhai, 19th March 2025: Vawiin khan District Child Protection Unit, Women and Child Development te chuan Mission Vatsalya hnuaia Sponsorship leh Foster Care ṭanpuina dawngtu naupang enkawltute tan Sensitization Programme chu Thangtea Hall, Kahrawt Vengah an buatsaih a. He hun hi Champhai Bawrhsap Pu Mohammad Aaquib, Sponsorship & Foster Care Approval Committee Chairman ni bawk chuan khuallian niin a hmanpui a ni.

Khuallian Pu Mohammad Aaquib chuan he hunah hian Champhai District Child Protection Unit ten hun ṭha tak an buatsaih chu lawmawm a tih thu sawiin, District mipuite dinhmun chiang zawka a hriat ve theihna tur remchang an siam sak chu lawmawm a tih thu a sawi bawk a. Khuallian hian Mission Vatsalya hnuaia naupang ten ṭanpuina an mamawh ang an hmu thei ṭhin chu thil lawmawm tak a ni tiin, a hun taka ṭanpuina a mamawhtu ten an dawn theih nan DCPU hnuaia thawktute chu theihtawp chhuah ṭhin turin a chah a ni.

Khuallian chuan kalkhawmte fuihna thu sawiin, harsatna hrang hrang an tawh te chu anmahni dal tu a hmang lo tur leh chona tharah ngai a, vawiina an dinhmun aia ṭha a an fate hlan kai tum turin a chah a. Thim chhah tak tawpah hian eng a awm ṭhin a ni tih hre reng tura fuihin an hma hun lo kal zel turah duhsakna sang ber a hlan bawk a ni.

Pi Vanlalhruaii, Protection Officer (NIC) chuan he hunah hian Sponsorship & Foster Care chungchang sawifiahna hun a hmang a. Juvenile Justice (Care and Protection of Children) Act, 2022 chuan a ṭul tawp khawkah loh chuan naupangte hi Child Care Institution-ah dah loh tur an ni, a ti a. Hemi bawhzui zel nan hian Mission Vatsalya hnuaiah naupang harsa zawk te chu an ei leh in, hriselna leh zirna senso chhawmdawl nan thla tin cheng 4000 a tanpui ṭhin an ni a. He ṭanpuina hi ṭhuanghnih - Sponsorship leh Foster Care anga kalpui a ni.

Sponsorship hi naupang retheihna avanga zirna chawlhsan hlauhthawn awma awm ten zirna an chhunzawm theih nan te, natna khirhkhan tuar ten inenkawlna ṭha an neih theih nan te, lehkha zir chawlhsan tawh te pawhin thiam thil an zir theih nan te, Children's Home atanga naupang dah chhuah ten an chhungte nena lei rem an rah theihna atan te leh thil dang danga harsatna tawk naupangten an lo hman tangkai a, nun ṭha zawk an lo neih theih na atana he programme hi duan a ni. Champhai District tan Sponsorship & Foster Care Fund hi kum 2024 - 2025 chhungin mamawhtu naupang 130 thlan chhuah te hnenah pek a ni.

District Child Protection Unit, Champhai kaltlang hian Sponsorship hi kum 2012 - 2025 chhungin naupang 693 hnenah pek a ni tawh a, Foster care hi naupang 60 hnenah pek a lo ni tawh bawk a ni.

He hun hi Pi R. Lalrinchhani, DCPO chuan  a kaihruai a, kalkhawmte lawmna thu sawiin,  District Child Protection Unit te hnathawh tlangpui sawifiahna hun a hmang bawk a ni. Pi R. Lalbiakhluni, Counsellor Child Helpline Unit chuan hunserh hmangin, Sponsorship and Foster Care Approval Commitee member-te aṭangin thusawi tawi ngaihthlak a ni a, he ṭanpuina dawngtute leh an chhungte atangin thusawi ngaihthlak a ni bawk.  Pi J. Lalruatlawki, LPO in kalkhawmte hnena lawmthu sawina a neih hnuah inkhawm hi tihtawp a ni.